مانگێش و گوندەکانی سوودیان لە باران و تەرزە نەبینی

964+

هیڤی دێوالی – دهۆک

بەهۆی بارانبارین و تەرزە نزیکەی 75%ی  گەنم و بەروبوومی جوتیارانی ناحیەی مانگێش زیانیان بەرکەوتووە، بەڕێوەبەرایەتی کشتوکاڵی دهۆکیش دەڵێت، “تا دوو هەفتەی دیکە، بەدواداچوون لەلایەن لیژنەکەمانەوە بەردەوام دەبێت، بۆ داتای زیان و میکانیزمی قەرەبووکردنەوەیان”.

لە سنووری دهۆک، ناحیەی مانگێش و زاوێتە 37 هەزار دۆنم زەوی  بە گەنم چێندراوە، بەشی هەرە زۆری  گەنمەکەش لە ناحیەی مانگێشە، ئەمساڵ بەهۆی بارانبارینەوە لە چەند گوندێکی ناحیەکە زیانی زۆر بەر گەنمی جوتیاران گەیشتووە.

بژێوییان کشتوکاڵە و کشتوکاڵەکەش باران زیانی پێگەیاندووە

ئەمڕۆ چوارشەممە 2024.5.29، هێرش زاوێتەی بەڕێوەبەری کشتوکاڵی دهۆک بە 964ی وت، “بۆ جاری سێیەم بارانبارین و تەرزە زیانی بە بەروبوومی جوتیارانی ناحیەی مانگێش گەیاندووە، لیژنەیەکمان پێکهێناوە بۆ بەدواداچوون بۆ زەوی و زاری جوتیارانی ناوچەکە، بۆ ماوەی دوو هەفتەی تریش بەدواداچوون بۆ تۆمارکردنی زیانەکان بەردەوام دەبێت”.

وتیشی، “تەنیا دوو گوند و بەشێکی گوندی بەرۆشکێ سەعدون تەواو کراون، بەشی زۆری گەنمەکە ئەمساڵ کەڵکی دروێنەی نیە و تێکچووە. لە ئێستادا ئامارێکی ورد لەبەر دەست نییە، بەڵام نزیکەی 75%ی  کشتوکاڵی ناوچەکە زیانی پێگەیشتووە”.

964دەزانێت، زیان بە دەیان جوتیاری ناوچەکە گەیشووە، تەنیا لە گوندی کورێمێ هەزار دۆنمی گەنم و داری بەردار و بەشێکی گوندی بەروشکی سەعدون 85% زیان پێیان گەیشتووە”.

ناحیەی مانگێش خاوەن 10 گوندە، خەڵکی گوندەکان بژێوی ژیانیان لەسەر کاری کشتوکاڵییە، ناحیەکە سەر بە قەزای دهۆکە لە سنووری پارێزگای دهۆک.

پێداچوونەوە: ئەحمەد مستەفا