وێنەی ژمارەیەک تانکەر لەکاتی گواستنەوەی سوتەمەنی لە دەروازەی پەروێزخان - فۆتۆ: سۆشیاڵ میدیا
بەهۆی وەرگرتنی بڕێک پارە
جموجوڵی بازرگانی لە مەرزی پەروێزخان و باشماخ وەستاوە
964+
ژووری هەواڵ
بە بڕیاری حکومەتی عێراق، بڕە پارەیەکی دیکە وەک گومرگ لە شۆفێری ئەو بارهەڵگرانە وەردەگیرێت کە لە هەردوو مەرزی باشماخ و پەروێزخان هاتوچۆی بازرگانی دەکەن، ئەمە نیگەرانی شۆفێرەکانی لێکەوتووەتەوە و بەوهۆیەوە مانیان گرتووە.
بڕیارەکە لە شەممەوە کەوتووەتە بواری جێبەجێکردنەوە و بڕی ئەو پارەیەی وەردەگیرێت لە شۆفێری بارهەڵگرەکان 15 هەزار دینارە.
ئەمڕۆ یەکشەممە 26.5.2024، نوێنەری شۆفێری بارهەڵگرەکان بە 964ــی وت، بارهەڵگرێکی زۆر لە مەرزی پەروێزخان ریزیان بەستووە و ئامادە نین بەهۆی ئەو بڕیارە کەلوپەلەکانیان بگوازنەوە.
لە کاتی رۆشتنی بارهەڵگرەکان بۆ ئێران داوایان لێدەکرێت پسوڵەیەکی 15 هەزاری ببڕن، ئەوکات دەتوانن بارەکانیان بگوازنەوە، شۆفێرەکان ئەوەیان رەتکردووەتەوە و بەهۆیەوە جموجوڵی بازرگانی راگیراوە.
964 پەیوەندیکرد بە بەڕێوەبەری مەرزی باشماخ و بەڕێوەبەری پەیوەندییەکانی مەرزی باشماخ، بەڵام ئامادە نەبوون وەڵام بدەنەوە.
جگە لەو 15 هەزارە ئەم بڕە پارانەش لەو شۆفێرانە وەردەگیرێت: 30 هەزار دینار بۆ سۆنەر، 17 هەزار دینار بۆ تەعقیم، پێنج هەزار دینار بۆ قەپان و کۆمپانیاکانیش بەگوێرەی جۆری بارەکە بڕێک پارە وەردەگرن.
هاتووچۆى گەشتیارى لە مەرزى باشماخ پەکى کەوت
