پێشانگایەکی کاری دەستی لە سۆران. فۆتۆ: سۆشیاڵ میدیا
دەرفەتی کاریان بۆدەڕەخسێت
دەستەی گەشتوگوزاری سۆران خولی راهێنان بۆ کاری دەستی دەکاتەوە
964+
ژووری هەواڵ
لە سنوری ئیدارەی سۆران، خولی راهێنان بۆ کارە دەستییەکان لە بواری بەرهەمە گەشتیارییەکان دەکرێتەوە، دەستەی گەشتوگوزاریش دەڵێت، هەلی کار بۆ بەشداربووان دەدۆزنەوە.
خولەکان بە هەماهەنگی لەگەڵ رێکخراوی UNDP و رێکخراوی هاوکاری دارایی USAID دەکرێنەوە و بەشداربووان دەبێت دەرچووی بەشەکانی گەشتوگوزار و هونەرەجوانەکان بن و حەزی کارە دەستییەکانیان هەبێت.
ئەمڕۆ دووشەممە 13.5.2024، ئیبراهیم عەبدولمەجید، وتەبێژی دەستەی گەشتوگوزار بە 964ـی راگەیاند، ئەم خولە بۆ پێگەیاندن و هاندانی خوازیارانی کارە دەستیەکان و رەخساندنی دەرفەتی کارە لەم بوارە.
“بەرهەمە دەستییەکان بەشێکی گرنگی کەرتی گەشتوگوزارن، دەمانەوێت ئەو کەلوپەلە دەستیانەی کە لە دەرەوەی وڵات دێن، ببنە بەرهەمی ناوخۆیی و کاری دەستی گەنجانی خۆمان”، وتەبێژی دەستەی گەشتوگوزار.
ئیبراهیم عەبدولمەجید وتیشی، ئەو کەلوپەلە دەستیانەی کە دروستدەکرێن دەدرێن بە گەشتیاران و دەیانەوێت مۆرکێکی کوردانەیان پێوە دیاربێت.
رێکەوتی 18.5.2024 دوا کاتە بۆ ناو تۆمارکردن و خوازیاران دەتوانن بۆ ناو تۆمارکردن پەیوەندی بەم ژمارەیەوە بکەن؛ 07507313132
خولەکە ماوەی پێنج رۆژ دەخایەنێت و بڕوانامەی بەشداریکردن دەدرێت بە بەشداربووان و تێچووی خول و هاتوچۆ لە ئەستۆی UNDP.
بەرێوەبەرایەتی گشتی گەشتوگوزاری سۆران دەڵێت، دوای خولەکە ئاسانکاری بۆ بەشداربووان دەکات تا لە شوێنێکی گەشتیاری کار بکەن و بەرهەمەکانیان بەبازار بکەن و لە کۆتایی خولەکە پێشانگایەکی کارە دەستییەکان بۆ بەشداربووان دەکرێتەوە.
