فەرمانگەی رێگاوبانی پێنجوێن کرایەوە
وەزیر: بە دووسایکردنی رێگەی پێنجوێن زیاتر لە 400 ملیار دیناری دەوێت
964+
کامیار کەمال – پێنجوێن
دانا عەبدولکەریم وەزیری ئاوەدانکردنەوە و نیشتەجێکردن لە حکومەتی هەرێمی کوردستان بە پەیامنێری 964ی وت لە پێنجوێن، “لە پلانی وەزارەتەکەیدا بە دووسایدکردنی رێگای پێنجوێن – سەیدسادق هەیە و دیزاینیشی بۆ کراوە”.
ئەمڕۆ یەکشەممە 21.4.20224، وەزیری ئاوەدانکردنەوە و نیشتەجێکردنی حکومەتی هەرێمی کوردستان سەردانی پێنجوێنی کردوو فەرمانگەی چاککردن و پاراستنی رێگاوبانی پێنجوێنی کردەوە و قسەی بۆ 964 کرد.
وەزیر ئەوەشی باسکرد، “دووسایدکردنی رێگای پێنجوێن- سەیدسادق پێویستی بە بودجەیەکی گەورە هەیە کە زیاتر لە 400 ملیار دینارە و لە ئێستادا لە توانای حکومەتدا نییە، بەڵام بۆ ساڵانی داهاتوودا ئەگەر بارودۆخی دارایی باشبێت ئەوا دەچێتە بواری جێبەجێکردنەوە”.
بڕیار وابوو لەسەرەتای مانگی 12ی ساڵی رابردوو فەرمانگەی چاککردن و پاراستنتی رێگاوبانی پێنجوێن بکرێتەوە، بەڵام بەهۆی تەواونەبوونی کۆمەڵێک رێکاری فەرمانگەکە لە وەزارەتی دارایی کردنەوەی فەرمانگەکە دواکەوت.
پێداچوونەوە: ئەحمەد مستەفا