دیمەنێک لە کارتی نیشتمانی عێراق _ وێنە: ئاژانسەکان
کارەکان چڕکراونەتەوە
ئێستا 86%ی عێراق و هەرێمی کوردستان کارتی نیشتمانی-یان هەیە
964+
ئەحمەد مستەفا
ئەمڕۆ دووشەممە، وەزارەتی ناوخۆی عێراق رایگەیاند، ژمارەی ئەو کارتە نیشتمانی- یانەی تا ئێستا تەواوکراون “گەیشتووەتە 37 ملیۆن کارت”.
فەریق میقداد میری، وتەبێژی وەزارەتی ناوخۆی عێراق بە ئاژانسی هەواڵی فەرمی عێراقی وتووە، “بەڕێوەبەرایەتی باری شارستانی و پاسپۆرت و ئیقامەی گشتی عێراق بەردەوامە لە کارە چڕەکانی لە دەرکردن و پێدانەوەی کارتی نیشتمانی بە تەواوی پارێزگاکانی عێراق هەرێمی کوردستان”.
بە گوێرەی وەزارەتی پلاندانان و داتای بەردەستیان، ژمارەی دانیشتووانی عێراق زیاتر لە 43 ملیۆنە کەسە، وتەبێژەکەی وەزارەتی ناوخۆ دەڵێت، “ژمارەی کارتە تەواوکراوەکان تا ناوەڕاستی مانگی نیسانی ئەمساڵ 37 ملیۆن کارتی تێپەڕاندووە” بەو پێیەش بێت 86%ی دانیشتووانی عێراق بوون بە خاوەنی کارتەکە.
ناسنامە باری شارستانی و جنسیە، لە تەواوی فەرمانگەکانی عێراق و هەرێمی کوردستان لە 1.4.2024 وە مامەڵەکردن پێیانەوە راگیراوە، فەرمانگەکان رۆڵی سەرەکییان داوە بە کارتی نیشتمانی و جێگرەوەی (تەسکەرە و جنسیەیە) بۆ زۆرێک لە مامەڵەکان کە فەرمانگەکان بۆ خەڵکی کاری لەسەر دەکەن.