بۆ موچەی مانگی سێیە
بەغدا 430 ملیار دیناری دیکەی نارد
964+
ژووری هەواڵ
بڕی زیاتر لە 430 ملیار دینار تەمویلی موچەی مانگی ئازار خرایە سەر هەژماری بانکی وەزارەتی دارایی.
وەزارەتی دارایی حکومەتی هەرێم رایگەیاند، کەمێک لەمەوبەر بڕی 430 ملیار و 109 ملیۆن دینار لەلایەن وەزارەتی دارایی حکومەتی عێراقەوە خرایە سەر هەژماری بانکی وەزارەتی دارایی و ئابوری هەرێمی کوردستان لە لقی هەولێری بانکی ناوەندی عێراق وەک بەشێک لە تەمویلی موچەی مانگی ئازاری فەرمانبەران و موچەخۆرانی هەرێمی کوردستان.
964 لە سەرچاوەیەکی وەزارەتی دارایی زانیویەتی کە بەهۆی ئەوەی رۆژانی هەینی و شەممە پشووە، بۆیە لەو دوو رۆژەدا هیچ بڕە پارەیەک نەنێردراوە و ئەمڕۆ رەوانە کراوە.
دوێنێ خانەنشینانى شارستانى و سەربازیی، خاوەنپێداویستییە تایبەتەکان، زیندانە سیاسیەکان و کەسوکارى شەهیدان موچەى مانگى ئازاریان وەرگرت و بڕیارە ئەمڕۆ یەکشەممەش 11 وەزارەت و فەرمانگە موچەى مانگى ئازار وەربگرن.
