نموونەی خانووێکی پلاستیکی لە کوردستان - وێنە: کشتوکاڵی بازیان
280 دانەیان لافاو زیانی پێگەیاندوون
خاوەنی خانووە پلاستیکییەکانی بازیان چاوەڕوانی قەرەبوون
964+
پێشەوا محەمەد
باران و لافاو زیانی بە 280 خانووی پلاستیکی کشتوکاڵی قەزای بازیان گەیاندووە، کشتوکاڵی بازیان دەڵێت، چاوەڕوانی قەرەبووکردنەوەن.
قەزای بازیان نزیکەی 16 هەزار خانووی پلاستیکی کشتوکاڵیی تێدایە، باران و لافاوی مانگی دووی ئەمساڵ زیانی بە بەشێکیان گەیاندووە.
زانیار تۆفیق، بەڕێوەبەری کشتوکاڵی بازیان بە 964ـی راگەیاند، ئەو خانووە پلاستیکیانەی زیانیان بەرکەوتووە هی 280 دانەن و هەیانە بەتەواوی رووخاوە و هەشیانە زیان بەر ئاسن و بەروبوومەکەی کەوتووە.
964 لە کشتوکاڵی بازیانەوە دەزانێت، زیانەکانیان بە نزیکەی 250 ملیۆن دینار دەخەمڵێندرێت.
ئەو خانووە پلاستیکییە کشتوکاڵییانە زۆرینەیان خەیار و تەماتەیان تێدا بەرهەم دەهێندرێت.
بەڕێوەبەری کشتوکاڵی بازیان وتیشی، “ئێمە لیژنەیەکمان بۆ دیاریکردنی خانووە پلاستیکییە زیانبەرکەوتووەکان پێکهێنابوو، کارەکانی تەواو بوون و ئەنجامەکەیمان داوەتەوە بە قایمقامیەتی بازیان تا کار بۆ قەرەبووکردنەوەیان بکرێت”.
