شارەوانی سلێمانی داوا دەکات پێدانی زەوی هاوڵاتیانیش بگرێتەوە

ژووری هەواڵ

ئەنجومەنی شارەوانی سلێمانی داوا دەکات بڕیاری پێدانی زەوی بە فەرمانبەران، هاوڵاتیانیش بگرێتەوە.

ئەمڕۆ چوارشەممە 3.4.2024، سەرۆكایەتی شارەوانی سلێمانی رایگەیاند، ئەنجومەنی شارەوانی کۆبووەتەوە و پێشنیاری ئەوەی کردوو کە “ئەم بڕیارە تەنها فەرمانبەران نەگرێتەوە، بەڵكو هاوڵاتیانیش بگرێتەوە بە تایبەتی ئەو هاوڵاتیانەی كە خێزاندارن و خاوەن مندڵێكی زۆرن، وە تا ئێستا سودمەند نەبوون و خاوەنی یەكەی نیشتەجێبوون نین”.

هەر لە کۆبوونەوەکەی ئەنجومەنی شارەوانی سلێمانیدا كێشەی پرۆژەی هێڵی ئاوی دووەمی دوكان – سلێمانی تاوتوێكرا و باس لەوە کرا کە لە ماوەیەكی نزیكدا لە رێگەی وەبەرهێنێكەوە ئەو گرفتە خزمەتگوزارییە چارەسەر دەكرێت.

لە ماوەی رابردوودا بەهۆی کوژانەوەی کارەبا و نەبوونی چاکسازی پێویست لە هێڵی ئاوی دووەمی دوكان – سلێمانی بەشێکی زۆر لە هاوڵاتیان توشی گرفتی کەمئاوی بوون و چارەسەرکردنی ئەمە بودجەیەکی گەورەی پێویستە، شارەوانی سلێمانی وا دەڵێت.

“هەر لە دانیشتنی ئەمڕۆی ئەنجومەنی شارەوانیدا، بڕیاردرا لەسەر دروستكردنی مزگەتێكی گەورە و هاوچەرخ، بە دیزانێكی جوان لەسەر ئەركی خێرخوازێك بۆ شاری سلێمانی، بەشێوەیەك كە زۆرترین هاوڵاتیان لە خۆبگرێت و كێشەی وەستانی ئۆتۆمۆبیلی بۆ چارەسەر بكرێت وە زۆر ترین رێژەی سەوزایی لە خۆ بگرێت”، ئەمە بەگوێرەی راگەیەندراوی کۆبوونەوەکە.