بۆریی ئاوی دوکان - سلێمانی - وێنە: 964
هۆشداری دراوە
هێڵی ئاوی دوکان – سلێمانی پێویستی بە محاویەلەیە
964+
پێشەوا محەمەد
وێستگەی کارەبای تاسڵوجە پێویستی بە محاویلەیەکی نوێیە کە تایبەتە بە هێڵی ئاوی دوکان – سلێمانی، هۆشداری دەدرێت لەوەی پێشتر کە کۆن بووە و لە ئەگەری خراپبوونی زیانی زۆر دەبێت.
دوێنێ چوارشەممە ئەنجومەنی شارەوانیی سلێمانی لەسەر ئەو بابەتە گوفتوگۆی کردووە و بڕیاری دابینکردنی ئەو محاویلەیە دراوە.
بەکر حەمەسدیق، ئەندامی ئەنجومەنی شارەوانیی سلێمانی بە 964ـی راگەیاند، ئەو محاویلەیەی کارەبای لێوە دەدرێت بە هێڵی ئاوی دوکان – سلێمانی زۆر کۆنە و پێویستی بە دانەیەکی نوێ هەیە.
وتیشی، “بەڕێوەبەری کارەبای سلێمانی هۆشداری دا ئەگەر ئەو محاویلەیە تێکبچێت چاککردنەوەکەی دوو ملیار دیناری پێویست دەبێت و بۆ ماوەیەکی زۆریش دانیشتوانی شاری سلێمانی بێ ئاو دەبن”.
ئەنجومەنەکە بڕیاری دروستکردنی لیژنەیەکی داوە بە زوویی دەرخستەیەک بۆ تێچووی کڕینی محاویلەکە بکرێت.
“لە ئەنجومەنی شارەوانی بڕیار درا لە رێگەی ئەو کۆمپانیا و سەرمایەدارانەی پڕۆژەیان بۆ دەردەچێت ئەو محاویلەیە بکڕدرێت”، بەکر حەمەسدیق وای وت.
