130 كیلۆگرام گه‌نمیان بۆ دابین كردوون
ژینگه‌دۆستانى هه‌ریر شوێن بۆ كۆتره‌كانى سه‌ر رێگاى گشتى دروستده‌كه‌ن
964+
فه‌رهاد حه‌سه‌ن
ژماره‌یه‌ك ژینگه‌دۆستى قه‌زاى هه‌ریر شوێنێكی تایبه‌تیان بۆ كۆتره‌كان له‌سه‌ر رێگایه‌كى گشتى دروستكردووه و ئه‌ركى به‌خێوكردنیشیان خستووه‌ته سه‌ر ئه‌ستۆى خۆیان.
شوێنى كۆتره‌كان كه‌وتووه‌ته سه‌ر رێگاى شێخ پیرباڵ كه له باتاسه‌وه ناوه‌ندى قه‌زاى هه‌ریر و لۆفه‌كانى سپیلك به‌یه‌كه‌وه ده‌به‌ستێته‌وه.
مامۆستا غازى باتاسی، ژینگه‌دۆست و سه‌رۆكى رێكخراوى هەریر و باتاس بۆ هاوکاری مرۆیی به 964ـى وت، ماوه‌یه‌كه ئه‌و شوێنه‌یان بۆ ئه‌م كۆترانه دروست كردووه و ئه‌مڕۆش 130 كیلۆگرام گه‌نمیان بۆ دابین كردوون.
هه‌مان پڕۆژه‌شیان بۆ كۆتره‌كانى سیده‌كان دروستكردووه.
وتیشی “ئه‌و شوێنه‌ى بۆ كۆتره‌كان دروستكراوه كه‌وتووه‌ته سه‌ر رێگاى گشتى و ئه‌و خه‌ڵكه‌ى هامومشۆى پێداده‌كات ئه‌و كۆترانه ده‌بینن”.
ئاماژه‌ى به‌وه‌شكرد، دروستكردنى شوێنى كۆتره‌كان له‌سه‌ر ئه‌م رێگایه وایكردووه خه‌ڵك له شوێنه‌كانى ده‌ره‌وه‌ى هه‌ریر كۆتر بهێنن و له‌و شوێنه دایبنێن.
پێشتر ژماره‌ى كۆتره‌كان كه‌م بوون، به‌ڵام ورده‌ورده ژماره‌یان زیاد ده‌بێت و ئێستا زیاتر له 20 كۆترى لێیه.
