کەپرە گەشتیارییەکانی دوکان - وێنە: 964
دەستەی گەشتوگوزار وەڵام دەداتەوە
مانگی رەمەزان دەبێتە هۆکاری کەمکردنەوەی گەشتیار بۆ هەرێم؟
964+
پێشەوا محەمەد
دەستەی گەشتوگوزار پێی وایە مانگی رەمەزان نابێتە هۆی کەمبوونەوەی هاتنی گەشتیار بۆ کوردستان، ئەوەش لەبەرئەوەی لە بەهار و نەورۆزدا گەشتیاری دەرەوەی کوردستان زۆر سەردانی هەرێم ناکەن.
رەمەزانی ئەمساڵ دەکەوێتە 11 یان 12ـی ئەم مانگەوە، نەورۆز و سەری ساڵی کوردیش، کە بەمانگی سەیران و گەشت و سەیران بەناوبانگە دەکەوێتە ئەو مانگەوە.
ئیبراهیم عەبدولمەجید، وتەبێژی دەستەی گەشتوگوزاری هەرێم بۆ 964ـی روونکردەوە، لەوەتەی دامەزراوەی گەشتیاری لە هەرێم دامەزراوە یەکەم جارە نەورۆز دەکەوێتە مانگی رەمەزانەوە و ئەمساڵ وەک ئەزموونی چۆنێتی مامەڵەکردن لەگەڵ ئەو بارودۆخە سەیر دەکەن.
وتیشی، “ئەو مانگە لە هەرێمی کوردستان زیاتر هاوڵاتیانی ناوخۆن لەنێوان سەیرانگا و شارە جیاوازەکاندا گەشت و سەیران دەکەن نەک گەشتیارانی دەرەوە، بۆیە مانگی رەمەزان کاریگەریی زۆری لەسەر کەمبوونەوەی گەشتیار نابێت لە هەرێمی کوردستان”.
ئاکرێ کە بووکی نەورۆز ناسراوە لە کوردستان، پلانی ئاگرکردنەوەی نەورۆزی ئەمساڵی تێدا گۆڕاوە و خراوەتە دوای بانگی ئێوارەوە.
وتەبێژەکەی دەستەی گەشتوگوزار وتیشی، “پلانی ئێمە لەگەڵ دەستەی ژینگە لەو مانگەدا پاراستنی سروشت و سەیرانگاکان و راگرتنیان بە پاکوخاوێنی”.
