بەڕێوەبەرى قوتابخانەکانى پشدەر بایکۆتیان شکاند

964+

محەمەد عەلى- قەڵادزێ

بە کۆى دەنگى بەڕێوەبەرى قوتابخانەکانى ناو قەزای قەڵادزێ، بڕیاردرا بە کردنەوەى دەرگاى قوتابخانەکان و شکاندنى بایکۆت، مامۆستایانى ناڕازیش دەڵێن: شکاندنى بایکۆت بەدەست بەڕێوەبەرەکان نییە.

964 دەزانێت، ئەمڕۆ لەهۆڵی پەروەردەی پشدەر، بە ئامادەبونی 40 بەڕێوەبەری قوتابخانەکانى ناو قەڵادزێ و بەڕێوەبەرى پەروەردەى پشدەر، کۆبوونەوەیەک ئەنجامدرا و بە کۆی دەنگ بڕیاردرا بایکۆت بشکێنن و دەست بە دەوام بکەنەوە.

لە بارەى بڕیارەکەوە، مەحمود حوسێن، بەڕێوەبەری پەروەردەی پشدەر بە 964ـى وت، “بە کۆى دەنگ بڕیارەکەمانداوە و لە سبەینێوە، دەرگاى قوتابخانەکان دەکرێنەوە و دەوامى ئاسایى دەستپێدەکاتەوە”.

بە وتەى بەڕێوەبەرى پەروەردەى پشدەر، لە سنوورى ناحیەکانى سەنگەسەر و ژاراوە، دەرگاى بەشێک لە ناوەندەکانى خوێندن کراونەتەوە و لە ناو سەنتەرى قەڵادزێشدا، دەرگاى باخچەکانى ساوایان کراونەتەوە و قوتابخانە ئامادەییەکانیش دەوامیان دەستپێکردووەتەوە.

پاساوى پەروەردەى قەڵادزێ بۆ ئەو بڕیارە ئەوەیە، لە زۆربەى شوێنەکانى دیکە خوێندن ئاسایى بووەتەوە و بایکۆت شکاوە، بۆیە بەڕێوەبەرى پەروەردەى پشدەر دەڵێت: “داواکارم مامۆستایان بگەڕێنەوە هۆڵەکانى خوێندن بۆ ئەوەى داهاتووى قوتابییەکانى سنوورەکەمان نەفەوتێت”.

یەکێک لەو بەڕێوەبەرانەى لە کۆبوونەوەکە بەشدارى کردووە، قسەى بۆ 964 کردووە و دەڵێت: هەڵپەساردنى بایکۆت بڕیارێکى ناچارى بوو، چونکە لە زۆربەى شارو شارۆچکەکاندا بایکۆت شکاوە”.

لە پەیامێکدا کە وەڵامێکە بۆ ئەو بڕیارە، دەستەى سەرپەرشتى مامۆستایان ناڕازی پشدەر دەڵێن: هیچ کات شکاندنى بایکۆت لە دەست بەڕێوەبەرەکاندا نییە.

پێداچوونەوە: وریا فەتاح

قوتابیانی پۆلی 12 لە قەڵادزی داوای کەمکردنەوەی مەنهەج دەکەن