پاککردنەوەی یەکێک لە کۆڵانەکانی بازیان دوای لافاوەکەی هەفتەی رابردوو - وێنە: پەیجی قەزای بازیان
لیژنە پێکهاتووە
زیانلێکەوتووانی لافاوەکەی بازیان قەرەبوو دەکرێنەوە
964+
پێشەوا محەمەد
لیژنەیەک لە قەزای بازیان بۆ زیانلێکەوتووانی لافاو پێکهێندراوە و قایمقام دەڵێت، زیانەکان دەخەمڵێندرێن و دواتر قەرەبوو دەکرێنەوە.
بەهۆی لافاوەکەی دوو رۆژی رابردوو، 40 ماڵ و دوو فەرمانگەی حکومی و چوار دوکان و چوار ئۆتۆمبێل و سێ پرد و 150 خانووی پلاستیکی زیانیان بەرکەوتووە.
ئیسماعیل ئەحمەد، قایمقامی قەزای بازیان بە 964ـی راگەیاند، لیژنەکە ئامادەیە و پێکهێندراوە و سەرجەم ئەو شوێنانە بەسەردەکاتەوە زیانیان بەرکەوتووە و پاشان راپۆرتی خۆیان لەوبارەیەوە پێشکەش دەکەن.
دەشڵێت، تا ئێستا قەرەبووەکە دیاری نەکراوە، چونکە دەبێت لیژنەکە زیانەکان بخەمڵێنێت و لەسەر قەبارەی زیانەکان و ئەو شوێنانەی زیانیان بەرکەوتووە بڕی قەرەبووەکە دیاری بکرێت.
لە دوو رۆژی رابردوودا شەپۆلێکی چری بارانبارین رووی لە هەرێمی کوردستان کرد و تا ئێستاش بە شێوەی جیا جیا بەردەوامە، هاوکات لەچەند ناوچەیەک، لافاو و پەنگخواردنەوەی ئاو زیانی گەیاندووە.
قەزای بازیان سەر بە پارێزگای سلێمانییە و نزیکەی 60 گوندی هەیە و زیاتر لە 70 هەزار دانیشتووی هەیە.
