له بێئاوى رزگاریان ده‌بێت
له گوندێكى قه‌ره‌داغ ئاوى كانییه‌ك ده‌كرێته پڕۆژه
964+
فه‌رهاد حه‌سه‌ن
گوندى دوكانى سه‌ر به قه‌زاى قه‌ره‌داغ ماوه‌ى چه‌ند ساڵكه كێشه‌ى بێئاویان هه‌یه، به‌ڵام به‌م دواییه بڕیار ده‌رچووه كه ئاوى كانییه‌كه‌یان بۆ بكرێته پڕۆژه و بێئاویان نه‌مێنێت.
کانی مەلا، تاكه سه‌رچاوه‌ى ئاوى گونده‌كه‌یه، بە قسه‌ى ریشسپیانى گوند له ساڵانى زوو كشتوكاڵى له‌به‌ر كراوه و بۆ خواردنه‌وه‌ش به‌كارهێندراوه، به‌ڵام دواى رووبه‌ڕووبونه‌وه‌ى وشكه‌ساڵى ئاوه‌كه‌ى به‌ره‌و كه‌مبوونه‌وه چووه و خه‌ڵكیش له‌رێگه‌ى ئامێری جیاوازه‌وه ئاوه‌كه‌یان ژیاندووه‌ته‌وه.
شێخ ره‌ئوف كه‌مال ، قایمقامى قه‌زاى قه‌ره‌داغ، به 964ـى راگه‌یاند، دواى داواكارى خه‌ڵكى گوند، سه‌ردانى كردوون و لیژنه‌یه‌كی تایبه‌تیش كه‌شفی بۆ كردوون و بڕیاردراوه ئه‌و سه‌رچاوه‌ى كانیه بكرێته پڕۆژه‌ى ئاوى خواردنه‌وه‌یان.
وتیشی “ره‌زامه‌ندى ته‌واو بۆ جێبه‌جێكردنى پڕۆژه‌كه‌یان ده‌رچووه و له داهاتووى نزیك جێبه‌جێ ده‌كرێت”.
ئاماژه‌ى به‌وه‌شكرد، جگه له‌و پڕۆژه‌یه بیرێكیش بۆ ئه‌م گونده لێده‌درێت بۆ ئه‌وه‌ى كێشه‌ى بێئاویان به‌یه‌كجارى نه‌مێنێت.
