بەرێوەبەرایەتی گشتی وەبەرهێنانی سلێمانی. وێنە :964
ئەگەر خزمەتگوزارییان باش نەبوو
دانیشتووانی سیتیەکان دەتوانن سکاڵا تۆمار بکەن
964+
دیلان محەمەد جەزا – سلێمانی
لەگەڵ تێپەڕبوونی چەندین ساڵ دانیشتووانی هەندێک لە کۆمەڵگەی نیشتەجێبونەکان گلەییان لە خزمەتگوزاری پڕۆژەکانیان هەیە، دانیشتووی یەکێک لە پرۆژەکان دەڵێت، پارەی خزمەتگوزاری وەردەگرن و پڕۆژەکە وێرانە.
محەمەد ساڵح دانیشتووی یەکێک لە پڕۆژەکان لە سلێمانی بە 964ـی وت، پڕۆژەکەیان زیاتر لە 10 ساڵە تەواو بووە و خاوەنەکەی مانگانە پارەی خزمەتگوزاری وەردەگرێت و هیچ بۆ ناو پڕۆژەکە ناکات.
باسی لەوەکرد، نە قوتابخانەی تیادا کراوەتەوە و نە رێگاوبانی بە کەڵک ماوە و سیمایەکی زۆر ناشرینی هەیە ناو پڕۆژەکەیان.
لەسەر ئەم بابەتە عەزیز محەمەد بەڕێوەبەری وەبەرهێنانی سلێمانی بە 964ـی وت، وەبەرهێنان بە دوو رێگە چاودێری پڕۆژەکانی نیشتەجێبوون دەکات و بەردەوام سەردانی پڕۆژەکان دەکرێت بۆ هەر کەموکوڕیەک هەبێت لە پڕۆژەکاندا.
باسی لەوەکرد، بەپێی یاسا لە کاتی تەواو بونی 100% پڕۆژەیەک شارەوانی پڕۆژەکە لە وەبەرهێنەرەکە وەردەگرێتەوە و وەک گەڕەکێک مامەڵەی لەگەڵ دەکات، بەڵام شارەوانی ئەو پڕۆژانەی وەرنەگرتوەتەوە تا ئێستا.
ئەوەی خستەڕو، دوای تەواو بوونی پڕۆژەکان کۆمپانیاکان خزمەتگوزاری ئەو پڕۆژانە وەردەگرن و لە کاتی بوونی هەر گلەییەکی هاوڵاتیان دەتوانن سکاڵاکانیان بگەیەننە وەبەرهێنانی سلێمانی.
