“سوپاس بۆ بایکۆتکردنتان”
964+
عادل کانەبی
ئەمڕۆ دووشەممە دوای تەواوبوونی پڕۆسەی دەنگدانی هەڵبژاردنی ئەنجومەنی پارێزگاکانی عێراق سەرۆکی رەوتی سەدر بە تویتێک سوپاسی هەوادارەکانی کرد.
موقتەدا سەدر لە تویتەکەی زۆر قسەی نەکرد تەنیا هاشتاگێکی دانا و نووسی،”سوپاس بۆ بایکۆتکردنتان” ئەمەش وەک ئاماژەیەک بوو بۆ ئەو کەسانەی کە ئەمڕۆ بەشداری هەڵبژاردنیان نەکرد و بایکۆتیان کرد.
ئەمڕۆ دووشەممە، هەڵبژاردنى ئەنجومەنى پارێزگاکان لە سەرتاسەرى عێراق، بێجگە لە پارێزگاکانى هەرێم، دەستیپێکرد کە تێیدا 15 ملیۆن و 108 هەزار و 135 کەس مافیان هەیە لە دەنگدانی گشتییدا دەنگبدەن، لەو ژمارەیە 868 هەزار و 901 دەنگدەر لە پارێزگاى کەرکوکە.
هاوکات، پێنج هەزار و 904 کاندید بەشدارى بردنەوەى 275 کورسى دەکەن، لەو ژمارەیە 254 کاندید کە لە 187 پیاو و 67 ژن پێکهاتوون، کێبڕکێى بردنەوەى 16 کورسى دەکەن کە یەکێک لە کورسییەکان، بۆ کۆتاى پێکهاتەکانە.
کورد لە هەڵبژاردنى ئەنجومەنى پارێزگاى کەرکوک، بە پێنچ لیست بەشدارە و بە تێکڕا 72 کاندیدیان هەیە و واپێشبینى دەکرێت زۆرینەى کورسییەکانى ئەنجومەنى پارێزگاکە ببەنەوە.
لە دواى پڕۆسەى ئازادى عێراقەوە، ئەمە چوارەم خولى هەڵبژاردنى ئەنجومەنى پارێزگاکانە و لە دواى 10 ساڵى رابردوشدا، یەکەمجارە بەڕێوەدەچێت.
