بەشێک لەو خواردنەی دەستیبەسەردا گیراوە. فۆتۆ: تەندروستی هەڵەبجە.
ویستویانە بیهێننە بازاڕەوە
لە مەرزێکی هەرێم دەستگیراوە بەسەر نزیکەی دوو تۆن و نیو خۆراک
964+
ژووری هەواڵ
لە ماوەی یەک هەفتەی رابردوودا، بڕی نزیکەی دوو تۆن و نیو خواردن لە مەرزی تەوێڵە-شوشمێ دەستیبەسەردا گیراوە و رێگە نەدراوە هاوردەی بازاڕەکانی هەرێمی کوردستان بکرێن.
ئەمڕۆ پێنجشەممە 14.12.2023، د. ئازاد مستەفا، بەڕێوەبەری تەندروستی هەڵەبجە، بە 964ـی راگەیاند، یەکەی پشکنینی خۆراکی مەرزی تەوێڵە-شوشمێ پشکنینیان بۆ بڕی دوو تۆن و 440 کیلۆ نەبات، هەنجیری وشک و میوەی وشککراو کردووە و دەرکەوتووە هاوتای تایبەتمەندی عێراقی نەبوون.
ئەو خواردنانەی دەستیانبەسەردا گیراوە پێکهاتوون لە یەک تۆن و 130 کیلۆ میوەی وشککراو، یەک تۆن و 10 کیلۆ نەبات و 300 کیلۆ هەنجیری وشک، کە لە وڵاتی ئێرانەوە هاوردە کراون.
ئەمساڵ لە مەرزی تەوێڵە – شوشمێ دەستبەسەر 200 تۆن خۆراکی خراپبوودا گیراوە، کە هەوڵ دراوە بهێندرێتە ناو هەرێم و ساغ بکرێتەوە.
مەرزەکە بنکەیەکی هەیە بەناوی بنکەی چاودێریی خۆراک، پشکنین بۆ ئەو خواردەمەنیانە دەکەن لە مەرزەکەیانەوە هاتوچۆیان پێدەکرێت.
