باڵندەی هوبارا - وێنە: oiseaux
لە کەشوهەوای کوردستان کێشەی نییە
باڵندەی هوبارا لە هەرێم زیاد دەکرێت
964+
پێشەوا محەمەد
دەستەی ژینگەی هەرێم و قەتەر لیژنەیەکیان پێکهێناوە بۆ زیادکردنی باڵندەی هوبارا لە هەرێمی کوردستان.
ئەمڕۆ یەکشەممە دووەم کۆبوونەوەی دەستەی ژینگەی هەرێم و قەتەڕ بەڕێوە چووە و لیژنەکە لەوێدا پێکهێندراوە و دەست دەکرێت بە هەنگاوی کرداری بۆ زیادکردنی ئەو باڵندەیە.
باڵندەی هوبارا ناوی زانستی “chlamydotis”ـە و چەند وڵاتێكدا دەژی، ئەو باڵندەیە ژیانی لەسەر مێرو یان رووەك و گژوگیاكانە.
بە پێی ئەو زانیارییانەی 964 لە دەستەی ژینگەی هەرێمەوە دەستیکەوتووە، ئەو باڵندەیە لە هەرێم بە هەرسێ جۆرەکانی بچووک، مامناوەند و گەورە بوونی هەیە و لەگەڵ کەشوهەوای هەرێمی کوردستان دەگونجێت.
هەر بەپێی ئەو زانیارییانەی بە 964 دراون، بیرۆکەی کارەکە دانانی سەنتەرێکە بۆ پێگەیاندن و چاودێریکردن و پاراستنی ئەو باڵندەیە، “چونکە لە جیهاندا روو لە کەمبوونەوەن”.
ئەو جۆرە باڵندەیە بەهۆی راوکردن و گۆڕینی زەوییەکان بۆ نیشتەجێبوون لە لایەن مرۆڤەوە مەترسیی لەناوچوونیان لەسەرە.
