مۆلیدەکەی نەخۆشخانەی پار خانوو بە خەڵکی گەڕەکەکە دەفرۆشێت

964+

ژووری هەواڵ

ئەو ماڵانەی کە کەوتوونەتە دەوروبەری نەخۆشخانەی پار لە هەولێر، حاڵیان بە دەست مۆلیدەی نەخۆشخانەکەوە شڕە و دەڵێن ئیسراحەتمان نەماوە.

خەڵکی ئەو گەڕەکە یاداشتێکیان داوە بە پارێزگاری هەولێر و کۆپییەکیان بۆ 964 ناردووە، تێیدا نووسیویانە ”چەند ساڵێکە ئەم کێشەیە هەیە، ئیسراحەتمان نەماوە، نە دەتوانین لە حەوشە دابنیشین، نە دەرگا و پەنجەرە بکەینەوە”.

خەڵکە هەراسانەکەی دەست مۆلیدەکەی نەخۆشخانەی پار دەڵێن، وایان لێهاتووە خانووەکانیان بفرۆشن، بەڵام بەهۆی خراپیی وەزعەکەوە کەس لێیان ناکڕێت، کار گەیشتووەتە ئەوەی ” ژاوەژاوەکە کاریگەری خراپی لەسەر قوتابخانەیەک هەبووە، کە لە نزیک مۆلیدەکەیە، شووشەی پەنجەرەیان کردووەتە سێ چین، بەڵام بە داخەوە هەر لە ئازاردان”.

نەخۆشخانەی پار یەکێکە لە نەخۆشخانە گەورە و دیارەکانی هەولێر، لەسەر شەقامی شەست مەترییە و لە گەڕەکی مامۆستایانە، ژمارەیەکی زۆری ماڵی بە دەورەوەیە، زۆربەیان دەکەونە پشتی نەخۆشخانەکەوە.

964 گلەیی خەڵکی ئەم گەڕەکە دەگەیەنێتە پارێزگاری هەولێر و وەڵامەکەی وەردەگرێتەوە.
ئێوەش ئەگەر سکاڵا و گلەیی، یان داوا و پێشنیارتان هەیە بۆمان بنوسن، خەمتان نەبێت جوابەکەی وەردەگرین.
ئەم ژمارەیە وەتساپ و تێلیگرام و ڤایبەری لەسەرە، لێرە بۆمان بنوسن:
07700990964