هاوڵاتیان لە بەڕێوەبەرایەتی پاسپۆرتی سلێمانی سەرقاڵی مامەڵەکردنن. وێنە: 964
سیستم دەگوازنەوە
کاری پاسپۆرت لە هەڵەبجە، شارەزوور و سەیدسادق دەوەستێت
964+
ژووری هەواڵ
تا کاتێکی نادیار، سەرجەم مامەڵەکانی دەرهێنان و نوێکردنەوە و وەرگرتنەوەی پاسپۆرت لە پارێزگای هەڵەبجە، قەزای سەیدسادق و قەزای شارەزوور رادەگیرێت.
ئەمڕۆ چوارشەممە 8.11.2023، بەڕێوەبەرایەتیی پاسپۆرتی هەڵەبجە بڵاویکردەوە، لە سبەینێ پێنجشەممەوە بەهۆی کارکردن لە سیستمی نوێی پاسپۆرت و گواستنەوەی سێرڤەری نوێی بەڕێوەبەرایەتییەکە، مامەڵەکانی دەرهێنان و نوێکردنەوە و وەرگرتنەوەی پاسپۆرت دەوەستن.
“ئاگاداری هاوڵاتیانی خۆشەویستی پارێزگای هەڵەبجە و قەزای سەیدسادق و قەزای شارەزوور دەکەینەوە، کە سەردانمان مەکەن تا کاتی چاکبوونی سیستم”، بەڕێوەبەرایەتی پاسپۆرتی هەڵەبجە وادەڵێت.
لە کۆتایی مانگی ئەیلولەوە، پارێزگای هەڵەبجە بووە خاوەنی سیستمی پاسپۆرتی ئەلیکترۆنی و سالار عەبدوڵا، بەڕێوەبەری پاسپۆرتی پارێزگای سلێمانی بە 964ـی وت، “بە گشتی رۆژانە 150 هاوڵاتی هەڵەبجە داوای پاسپۆرت دەکەن و بەو سیستمە بێ هیچ کێشەیەک دەتواندرێت کاری هاوڵاتیان رایی بکرێت”.
وتیشی، “بەو سیستمە ئەلیکترۆنییە هاوڵاتیان لە کەمترین ماوەدا دەبنە خاوەنی پاسپۆرت و ئەوەی کراویشە لەبەرچاوگرتنی هەڵەبجەیە وەک شاری شەهیدان بۆ زیاتر خزمەتکردنی هاوڵاتیانیان”.
