هەوڵی زیادکردنی پێشینەی خانووبەرە دەدرێت

964+

پێشەوا محەمەد

ئەنجومەنی نوێنەرانی عێراق لە بەرنامەیدایە یاسای سندوقی نیشتەجێبوون هەموار بکاتەوە و پێشینەی خانووبەرە لە 60 ملیۆنەوە بۆ 75 ملیۆن دینار زیاد بکات.

جگە لە زیادکردنی بڕەکەی، هاوکات پێشکەشکردن و وەرگرتنی پێشینەکەش بە ئەلیکترۆنی دەکرێت.

مەهدییە ئەلامی، ئەندامی لیژنەی خزمەتگوزاری و ئاوەدانکردنەوەی ئەنجومەنی نوێنەرانی عێراق بە رۆژنامەی سەباحی نیمچەفەرمیی عێراقی راگەیاندووە، هەوڵەکە بۆ ئەوەیە هاوڵاتیان زیاتر لەو پێشینەیە سوودمەند بن و خاونووەکانیان پێ تەواو بکەن.

مەرجی وەرگرتنی پێشینەکە ئەوەیە دەبێت ئەو کەسەی داوای دەکات خاوەنی زەوی بێت.

“پێشینەکە بێ خستنەسەری هیچ سوودێکە و زیادکردنەکەشی لە لایەن بەڕێوەبەری گشتی سندوق و بەڕێوەبەری گشتیی شارەوانییەکانی بەغدا رەزامەندی لەسەر دراوە”، ئەوەش قسەی مەهدییە ئەلامییە.

جگە لە سندوقی نیشتەجێبوون، لە عێراق بانکەکانی رەشید و رافیدەین قەرزی 150 ملیۆن دیناری دەدەن بە فەرمانبەران بە مەبەستی دروستکردنی خانوو.

وا بڕیاریشە دوای کردنەوەی بانکی نیشتیمان لە هەرێمی کوردستان، کە هاوتای بانکەکانی رەشید و رافیدەینە، ئەو قەرز و پێشینانە هاوڵاتیانی هەرێمیش بگرێتەوە.

وەرگرتنەوەی پێشینە لە کەفیل هەڵوەشێنرایەوە