کاتی لێدانی بیرەکەی نەخۆشخانەی هیوا لە سلێمانی - وێنە: بەڕێوەبەرایەتیی ئاوی ژێرزەویی سلێمانی
بیرێکیان بۆ لێدرا
نەخۆشخانەی هیوا لە بێئاوی رزگار کرا
964+
پێشەوا محەمەد
بە لێدانی بیرێکی ئاو بە قووڵیی 421 مەتر نەخۆشخانەی هیوا لە بێئاوی رزگار کرا.
نەخۆشخانەکە خۆی دوو هێڵی ئاو و بیرێکیشی هەیە، بەڵام بیرەکە کەڵکی نەماوە و بەکارناهێندرێت، بۆیە ئەو بیرەیان بۆ لێدراوە.
964 لە بەڕێوەبەرایەتیی ئاوی ژێرزەویی سلێمانییەوە دەزانێت، ستانداردی مۆڵەتی بیر لە سلێمانی تا 300 مەترە، بەڵام لە 300 مەتردا بیرەکەی نەۆخشخانەی هیوا نەگەیشتووەتە ئاو و لەبەر گرنگیی نەخۆشخانەکەش 121 مەتریان بۆ زیاد کردووە.
عەباس عەلی، بەڕێوەبەری ئاوی ژێرزەویی سلێمانی بە 964ـی وت، “ئەو سنوورە تەبەقەی تانجەرۆی پێدەڵێین و ئاوی کەمە، بۆیە بیرەکە بە ئاسانی نەگەیشتە ئاو”.
وتیشی، “ئێستا بیرەکە ئاوی پێویست دەدات و دەتوانێت پێنج کاتژمێر ئاو بدات و 12 کاتژمێر بکوژێندرێتەوە، لانیکەم لە ئێستادا کێشەی بێئاویی نەخۆشخانەکە چارەسەر کراوە”.
بودجەی بیرەکە 33 ملیۆن دینار بووە و تەواوی ستاف و ئامێرەکەی هی بەڕێوەبەرایەتیی ئاوی ژێرزەویی سلێمانی بوون.
