کێڵگەیەکی کشتوکاڵی - وێنە: بەڕێوەبەرایەتی کشتوکاڵی سلێمانی
دەست بە ئاوەوە بگرن
لە عەربەت 20% کشتوکاڵکردن کەمی کردووە
964+
ئەحمەد مستەفا
کەمبوونەوەی رێژەی ئاو، کاریگەری لەسەر بەرهەمی کشتوکاڵی عەربەت دروستکردووە، بە وتەی بەڕێوەبەری کشتوکاڵی ناوچەکە بێت، “تا %20 کشتوکاڵكردن کەمی کردوە”.
ناحیەی عەربەت کە بە دووری 19 کیلۆمەتر دەکەوێتە باشووری سلێمانی، خاوەنی هەشت هەزار زەوی دێم و بەراوە، لە دەشت و گوندەکانی سنوورەکە چەند جۆرێکی کشتوکاڵ دەکرێ، “برنج، پەمو، لۆکە، ماش، قەرەخەرمان، تەماتە، خەیار، کاڵەک و شووتی”.
بەڵام زۆرینەی ئەم بەرهەمان دەکەونە ئەو گوندانەی سەرچاوەی ئاو و کانیان هەیە، بۆ رێگرتن لە بەهەدەردان بە فەرمانی وەزارەتی کشتوکاڵ بڕیاردرا، جوتیارەکان بە نۆرە ئاو وەربگرن و رووبەرێکی کەم بکەن بە مەرەزە یان کشتوکاڵ.
شاسوار جەلال، بەڕێوەبەری کشتوکاڵی عەربەت بە 964ی وت، “بە قەبارەی ساڵانی پێشوو کشتوکاڵ نەکراوە، بە رێژەیی و هاوتای کەمبوونەوەی %20ی ئاو، کشتوکاڵکردنیش لە سەدا 20 کەمتر کراوە”.
شاسوار جەلال نایشارێتەوە، کە پێداویستی لەسەر ئاوەکە زیادی کردووە و بەردەوامیش خواست روو لە بەرزییە، “بە تایبەت بەرهەمی وەک برنج، کە ماوەی 20 رۆژ ئاوی بەردەوامی پێویستە”، شاسوار جەلال داوایکرد، “جوتیاران دەست بە ئاوەوە بگرن”.
