کۆبوونەوەی هەردوو شاندی حکومەتی هەرێم و حکومەتی ناوەندیی بەغدا.
هەرێمی کوردستان داوای 775 ملیار دیناری لە بەغدا کردووە
964+
ژووری هەواڵ
لە کۆبوونەوەکانی دوێنێ پێنجشەممەی شاندەکەی هەرێمی کوردستان لەگەڵ لایەنەکانی عێراق، داوای 775 ملیار دیناری مانگانە کراوە بۆ دابینکردنی موچەی فەرمانبەران.
ئەمە سەرچاوەیەکی ئاگادار لە کۆبوونەوەکان بە 964ـی وت.
وتیشی، داواکراوە بۆ هەریەک لە مانگەکانی 7، 8، 9، 10، 11 و 12 ئەو بڕە پارەیە بێت، کە بە کۆی گشتی دەکاتە چوار ترلیۆن و 650 ملیار دینار.
شەوی رابردوو، دوای کۆبوونەوەی لەگەڵ سەرۆک وەزیران و چەندین لایەنی دیکەی عێراقی، سەرۆکی حکومەتی هەرێمی کوردستان بە رۆژنامەنووسانی وت، گەشبینە سەبارەت بە هاتنی موچەی فەرمانبەران.
مەسرور بارزانی سەرۆکی حکومەتی هەرێم بە دیاریکراوی وتی، “ئێمە بە ئومێدین، چاوەڕێ دەبین تاوەکو کۆبوونەوەی هەفتەی داهاتووی ئەنجومەنی وەزیران [عێراق]، زۆر زۆر گەشبینم لەوێ بڕیاری باش بدرێت”.
کێشەکە چییە؟
کێشەی نێوان هەرێم و بەغدا لەسەر بەشەبودجەیە، هەردوولا یەکتری تۆمەتبار دەکەن بە پابەند نەبوون بە رێکەوتنەکانیان.
حکومەتی عێراق دەڵێت، بۆ ماوەی چەند مانگی رابردوو کاتێک هەناردەی نەوتی کوردستان بە بڕیاری دادگای ناوبژیوانیی پاریس راگیرابوو، حکومەتی هەرێم هیچ داهاتێکی بۆیان نەناردووە تاوەکو بەشەبودجەی بۆ بنێرن.
حکومەتی عێراقی دەشڵێت، ئەگەر نەوت نەبووبێت، حکومەتی هەرێم دەیتوانی داهاتی ناوخۆ و داهاتی سنورەکانی بۆ بنێرێت.
لە بەرامبەردا، حکومەتی هەرێمی کوردستان دەڵێت، راگیرانی هەناردەی نەوت لەدەستی خۆیدا نەبووە و ناچار بووە داهاتەکانی دیکەش لەدەستی خۆیدا بهێڵێتەوە چونکە موچەی فەرمانبەرەکانی لەئەستۆدایە.
هەروەها حکومەتی هەرێم بە بەردەوامی داوا دەکات، حکومەتی ناوەندیی سەرجەم شایستە داراییەکانی بۆ بنێرێت.
