لە شارى سلێمانى
مزگەوتى گەورەى راپەڕین سووتا
+964
دیلان محەمەد -سلێمانی
نیوەشەوى رابردوو، مزگەوتى گەورەى راپەڕین لە شارى سلێمانى ئاگرى گرت و بەهۆیەوە شوێنى نوێژخوێنانى مزگەوتەکە بەتەواوەتى سووتا.
رووداوەکە کاتژمێر 12:57 خولەکى نیوەشەوى رابردوو روویداوە، بە وتەى ئارام عەلى وتەبێژى بەرگرى شارستانى سلێمانى کە بۆ 964 قسەى کردووە، لەگەڵ ئاگادارکردنەوەیان، تیمەکانیان گەیشتوونەتە شوێنەکە و توانیویانە ئاگرەکە کۆنتڕۆڵ بکەن.
وەک باسى دەکات، هۆڵى مزگەوتەکە و شوێنى نوێژخوێنان سووتاوە، بەڵام خۆشبەختانە زیانى گیانى نەبووە.
لەبارەى هۆکارى کەوتنەوەى ئاگرەکە، وەک ئەوەى ئارام عەلى خستییەڕوو، بەپێى لێکۆڵینەوە سەرەتاییەکان لە شۆرتى کارەباوە دروستبووە.
پێداچوونەوە: وریا فەتاح
