دەرکەوتنی دوو شۆفڵ لە کاتی کارکردن لە شەقامی سلێمانی - عەربەت - وێنە: شارەوانیی سلێمانی
باران وای لێکردووە
شارەوانیی سلێمانی رۆچوونی شەقامی سلێمانی – عەربەتی چاک کرد
964+
پێشەوا محەمەد
شارەوانیی سلێمانی رۆچوونی شەقامی سلێمانی – عەربەتی چاککرد، کە بەهۆی بارانبارینەوە بەشێکی شەقامەکە تووشی رۆچوون بووبوو.
چاککردنەکە ئێستا بەشێوەی کاتییە، چونکە کارگەی قیری شارەوانی لەکاردا نییە، بۆیە بە قیری سارد چاک دەکرێت.
“باران و کۆبوونەوەی ئاو بەشێکی شەقامی سلێمانی – عەربەتی تووشی رۆچوون کردبوو، لە لایەن هاوڵاتیانەوە ئاگادار کراینەوە و بەشی ئامێرەکانی شارەوانی ئەمڕۆ چاکیان کردەوە”، زەردەشت رەفیق، وتەبێژی شارەوانیی سلێمانی وای بە 964 وت.
وتیشی، “ئەو رۆچوونە کێشەی بۆ هاتوچۆ دروستکردبوو و هەروەها جێگای مەترسیش بوو بۆ شۆفێران”.
کارگەی قیری تانجەرۆ، کە تایبەتە بە شارەوانیی سلێمانی، هەموو ساڵێک لە کۆتایی مانگی یەک تا مانگی پێنج نۆژەن دەکرێتەوە و قیر بەرهەم ناهێنێت.
وتەبێژەکەی شارەوانیی سلێمانی ئاماژەی بەوەش دا، هەرکات کارگەی قیرەکەیان کەوتەوە ئیشکردن قیری شەقامەکە نوێدەکەنەوە.
