وێنەی ماسییە خراپبووەکان. فۆتۆ: قایمقامیەتی سەیدسادق
شێوازی هەڵگرتنیان تەندروست نەبووە
پیکابێک بە 150 کیلۆ ماسییەوە گیرا
964+
هاوبەش ئەبوبەکر
لە سەیدسادق پیکابێک بە 150 کیلۆ ماسی خراپبووەوە چووەتە نێو بازاڕی قەزاکە بە مەبەستی ساغکردنەوەی بارەکەی، بەڵام رێگریلێکراوە و دەستگیراوە بەسەر ماسییەکاندا.
ئەمڕۆ چوارشەممە 4.10.2023، تەها ئەحمەد، بەرپرسی بەشی راگەیاندنی قایمقامیەتی سەیدسادق بە 964ـی راگەیاند، پاش پشکنین بـۆ ماسییەکان لەلایەن نوێنەری هۆبەی ڤێتێرنەری سەیدسادق، دەرکەوت کە شیاوی خواردن نییە و سەرجەمیان لەلایەن لیژنەکەوە لەناوبران.
هیچ یەکێک لە ماسییەکان زیندوو نەبوون و شێوازی هەڵگرتنەکەیان تەندروست نەبووە و بووەتە هۆی تێکچوونی گۆشتەکەیان.
“رۆژانە هاوڵاتیانی پارێزگا و قەزاکانی تری چواردەورمان هەموو جۆرە شتومەک و کاڵایەک دەهێنن بۆ ناو بازاری قەزاکەمان و ئێمە لە رێگای لیژنەکانمانەوە بە وردی چاودێری بازار و فرۆشگا و مارکێتەکان دەکەین”، تەها ئەحمەد وای وت.
