ئۆتۆمبێلی حکومی لە بەنزینی 750 دیناری بێبەشە
964+
شڤان عەبدوڵا – زاخۆ
ئیدارەی سەربەخۆی زاخۆ بڕیاریداوە ئۆتۆمبێڵی حکومی نابێت بەنزینی 750 دیناری وەربگرێت.
بە پێی ئەو دابەشکاریيەی بۆ بڕی بەنزینی هاتوو، کە 540 هەزار لیترە، پشكی قەزای زاخۆ و باتیفا 70 هەزار لیترە، قایمقامی قەزای زاخۆ دەڵێت، ئەو رێژەیە کەمە و قەرەباڵغی لە بەنزیخانەکان دروست بووە.
عوسمان عەلی، بەرپرسی لیژنەی سووتەمەنی لە قایمقامەتی زاخۆ بۆ 964 وتی، پێشتر ئوتومبێلە حکومییەکان بەبێ نۆرەگرتن لە بەنزینخانەکان بەنزینیان وەردەگرت، بڕیاردراوە لەمەودوا بەشی ئەوان دەدرێتە هاوڵاتیان.
عوسمان عەلی وتیشی، رێژەی ئەو بەنزینەی بۆ زاخۆ دێت زۆر کەمە، رۆژانە تەنیا 70 هەزار لیتر دێت، لە کاتێکدا بۆ ئەوەی سەرە دروست نەبێت، زاخۆ پێویستی بە 210 هەزار لیتر بەنزین هەیە، کە دەکاتە شەش تانکەر .
لە قەزای زاخۆ و باتیفا تەنیا لە سێ بەنزینخانە بەنزینی 750 دیناری دابەش دەکرێت.
پێداچوونەوە: فەهمی نەبی