زیاتر لە 75 هەزار پەنجەماسی خرانە نێو بەنداوی خنس لە دهۆک

964+

هاوبەش ئەبوبەکر

زیاتر لە 75 هەزار پەنجەماسی کارب خرانە نێو بەنداوی خنس لە دهۆک، وەزارەتی کشتوکاڵیش دەڵێت، بەنیازن پرۆژەیەک گەشتیاری سەردەمیانە لە دەوروبەری بەنداوەکە دروستبکەن.

ئەمڕۆ سێشەممە 1.8.2023، عەلی تەتەر پارێزگاری دهۆک لە کۆنفرانسێکی رۆژنامەوانیدا رایگەیاند، پەنجەماسییەکان لە جۆری کاربن و دوو بەنداوی دیکەش دەستنیشانکراون بۆ ئەوەی پەنجەماسیان بۆ دابینبکرێت.

“چەند بەنداوێکی دیکەش کە ئێستا کاریان تێدا دەکرێت، وەکو بەنداوەکانی گەلی بەنداوا و بەنداوی سپنە، کە پڕ ئاو بوون” پەنجە ماسیان بۆ دابیندەکرێت، پارێزگاری دهۆک وای وت.

بەنداوی خنس لە قەزای شێخانی سەر بە پارێزگای دهۆکە، ئەمساڵ کارەکانی تەواو بووە، توانای گلدانەوەی حەوت ملیۆن مەتر سێجا ئاوی هەیە.