155 ملیۆن دۆلار زیانەکانیەتی

پێنج رۆژە کەشتییەک بە سێ هەزار ئۆتۆمبێلەوە دەسووتێت

964+

پێشەوا محەمەد

لە ئێوارەی سێشەممەی هەفتەی رابردووەوە کەشتییەک لە کەناراوەکانی هۆڵەندا گڕی گرتووە و زیاتر لە سێ هەزار ئۆتۆمبێلی لەسەرە و تا ئێستاش ئاگرەکە بەردەوامە و پێشبینی دەکرێت زیانەکانی 155 ملیۆن دۆلار بێت.

بەپێی گێڕانەوەی گاردیانی بەریتانی لە زاری تیمەکانی ناو کەشتییەکەوە، گومان دەکرێت هۆکاری ئاگرکەوتنەوەکە بۆ یەکێک لە ئۆتۆمبێلە کارەباییەکان بگەڕێتەوە، کە لەسەر کەشتییەکە بووە و دواتریش پەرەی سەندووە.

کەشتییەکە هی کۆمپانیای کەی لاینە و ویستوویەتی ئۆتۆمبێلەکان لە وڵاتی ئەڵمانیاوە بەرەو میسڕ بگوازێتەوە.

رۆژنامە بەریتانییەکە روونیکردووەتەوە، هۆکاری دواکەوتن لە کۆنتڕۆڵکردنی ئاگرەکە بۆ ئەوە دەگەڕێتەوە، تیمەکان لە ترسی نقوبوونی کەشتییەکە ناتوانن ئاو بە سەرەوەی کەشتییەکەدا بکەن و تەنیا لە لاوە ئاوپڕژێنی دەکەن.

ئاماژە بەوەش کراوە، لە کاتی گەیشتنی تیمە فریاگوزارییەکان بەهۆی بەتینی ئاگرەکە ئەندامێکیان گیانی لەدەستداوە و چەند کەسێکی تریشیان لە کاتی خۆفڕێدانیان بۆ ناو ئاوەکە بریندار بوون.

هەر بە پێی زانیارییەکانی رۆژنامەکە، هیچ کام لە تیمە کەشتیوانییەکە زیانیان بەرنەکەوتووە و زوو رزگار کراون.