لۆبیا و بامیه‌كه‌ى گۆپته‌په پێگه‌یشت
964+
ژوورى هه‌واڵ
ساڵانه به‌ده‌یان دۆنم زه‌وى له سنوورى ناحیه‌ى گۆپته‌په بۆ كشتوكاڵ داده‌چێندرێت، له‌ناویاندا بامیه و لۆبیاكه‌ى ناوبانگێكی باشی په‌یداكردووه.
جوتیارێك ده‌ڵێت، ئه‌مساڵ بازاڕی لۆبیا و بامیكه‌یان زۆرباشه، به‌ڵام هیلاكی و ماندووبوونى زۆره.
ژماره‌یه‌ك كرێكار له‌ناو كێڵگه‌كه‌ى خالید محه‌مه‌د گۆپته‌په‌یی ده‌بینرێت كه خه‌ریكی لێكردنه‌وه‌ى لۆبیا و دواتریش بامیه‌كانى لێده‌كه‌نه‌وه.
خالید، ئه‌مساڵ زه‌ویه‌كى زۆرى بۆ داچاندنى لۆبیا و بامیه ته‌رخان كردووه، بۆ 964 ئاماژه به‌وه ده‌كات، ساڵانه لانیكه‌م 10 دۆنم لۆبیا و بامیه ده‌چێنێت و ده‌شڵێت “به‌رهه‌مه‌كانم ره‌واجی زۆریان له‌سه‌ره”.
باس له‌وه‌شده‌كات، ساڵانى پێشتر به‌رهه‌مه‌كانى ده‌برده عه‌لوه‌ى سلێمانى به‌ڵام له‌مساڵه‌وه هه‌ر له عه‌لوه‌كه‌ى چه‌مچه‌ماڵ ساغیان ده‌كاته‌وه.
به‌قسه‌ى ئه‌و جوتیاره، ئه‌و زه‌ویه‌ى بۆ لۆبیا و بامیه به‌كاریهێناوه، پێشتر گه‌نمى لێ چاندبوو، كه ئه‌و به‌رهه‌مانه‌شی كۆتایی دێت زه‌ویه‌كه‌ى بۆ به‌رهه‌می دیكه به‌كارده‌هێنێته‌وه.
ده‌شڵێت “جگه له‌و به‌رهه‌مانه، شوتى و بیبه‌ر و ته‌ماته و خه‌یاریشم چاندووه”.