لە کوێستانەکانی مێرگەدرێژانی گوندی زینوە مین بە شوانێک دەقێتەوە و دەیکوژێت

964+

ئاسۆ فەیسەڵ – سۆران

ئێوارەی ئەمڕۆ شەممە 18.6.2023، هاوڵاتییەک بەهۆی پێدا تەقینەوەی مین لە کوێستانەکانی زینوێی حاجی ئۆمەران گیانی لەدەستدا.

فارس حەمەدئەمین تەمەن 61 ساڵ کە دانیشتووی گوندی سرێشمەی سنووری ناحیەی خەلیفانە، ئەو کەسەیە کە مینی پێدا تەقیوەتەوە.

فارس، ژیانی هاوسەرگیری پێکهێناوە و پێشتریش لە ساڵی 2020 لە هەمان شوێن هەر بەهۆی پێدا تەقینەوەی مین قاچێکی لەدەستدابوو، بەڵام ئەمڕۆ کە بۆ جاری دووەم مینی پێدا تەقیەوە، دەستبەجێ گیانی لەدەستداوە.

ئەو پیاوە بە تەمەنە، پێشتر لەلایەن خەڵکی گوندەوە ئاگادار کراوەتەوە لە بوونی مین لە کوێستانەکانی زینوەی حاجی ئۆمەران، بەڵام بەهۆی ئەوەی شوانە، بەردەوام لە لەوەڕاندنی مەڕ و ماڵەتەکەیەتی.

رابەر ئەنوەر، بەرپرسی راگەیاندنی مین بە 964ـی وت، رووداوەکە کاتژمێر 5:30ـی خولەکی ئەم ئێوارەیە روویداوە و دەستبەجێ گیانی لەدەستداوە.

فارس حەمەدئەمین، بۆ مەستی ئاژەڵداری چووەتە کوێستانەکانی مێرگە درێژان گوندی زینوە سەربە ناحیەی حاجی ئۆمەران.

ئەحمەد حەسەن، بەڕێوەبەری تەندروستی چۆمان بە 964ـی وت، دوای گەیشتنی تەرمەکە بە نەخۆشخانەی چۆمان، ئێستا رەوانەی پزیشکی دادی سۆران کراوە.

ئەمساڵ لە سنووری پارێزگای هەولێر، ئەمە پێنجەم حاڵەتی تەقینی مین بووە بە هاوڵاتیان، بەهۆیەوە دوو کەس گیانی لەدەستداوە و سێ کەسی تریش کەمئەندام بوون.

پێداچوونەوە: فەرمان سادق