نرخی غاز لە سلێمانی گران بووە

964+

دیلان محەمەد جەزا – سلێمانی

نزیکەی مانگێکە غاز لە کارگەکانی سلێمانی کەمبووەتەوە، ئەوەش وای کردووە نرخی غاز 1500 دینار گران ببێت.

هۆکاری کەمیی غازەکە بۆ چاکسازی لە کێڵگەی کۆرمۆر لە چەمچەماڵ دەگەڕێتەوە، کە ساڵانە ئەنجام دەدرێت.

بە پێی بەدواداچوونەکانی پەیامنێری 964، بریکارەکانی غاز لە بەنزینخانەکان بوتڵەکان پڕدەکەنەوە و لە کۆڵانەکانی ناوشاری سلێمانی دەیفرۆشن.

پێشتر نرخی بوتڵێک غاز، کە 28 کیلۆ بوو بە 8500 دینار دەفرۆشرا، بەڵام ئێستا لە بەنزینخانەکان پڕدەکرێنەوە و دوو کیلۆش کەمی کردووە، بەڵام هەر بوتڵێک بە 10 هەزار دینار دەفرۆشرێت.

“لەگەڵ ئەوەی غازی بەنزینخانەکان نەبووایە ئێستا نرخی بوتڵێک غاز دەبوو بە 50 هەزار دینار، بەڵام کارێکی نایاساییە و دەبێت رێگری لە بریکارەکان بکرێت بوتڵەکانیان لە بەنزینخانە پڕ بکەن”، ئەوە قسەی کۆچەر تاهیر، نوێنەری کارگەکانی غازە لە شاری سلێمانی بۆ 964.

پێداچوونەوە: پێشەوا محەمەد