ماتۆڕە بێسەرەتاكان لە بەردەم دوكانەكان كۆكرانەوە

+964

شیراز عەبدوڵا – هەولێر

هاتوچۆی هەولێر دەستی بەسەر 300 ماتۆڕسكیلدا گرت كە هێڵی هاتوچۆیان پێشیلكردووە.

بەیانی ئەمڕۆ سێشەممە، هاتوچۆی هەولێر هەڵمەتێكی بۆ دەستبەسەراگرتنی ئەو ماتۆڕانە دەستپێكرد كە لەناو بازاڕی ماتۆڕفرۆشان هێڵیان بۆ دیاریكراوە و هێڵەكەیان پێشێلكردووە.

فازڵ حاجی، وتەبێژی هاتوچۆی هەولێر بە 964وت، ماتۆڕەكان بێسەرەتان رێگەیان گرتووە و پێشێلی یاسایان كردووە، هێڵمان بۆ كێشاون كە لەو هێڵە زیاتر دەرنەچن، بەڵام ئەمڕۆ پێشێلكراوە و دەستبەسەر ماتۆڕەكاندا گیراوە.

بەڕێوبەرایەتی هاتوچۆی هەوڵێر دەڵێت، بە بڕیاری ژمارە یەكی ساڵی 2016 سەرجەم ماتۆڕەكان پاندەكرێنەوە و بە شێوەی ئاسن لە فرۆشتنێكی ئاشكرادا دەفرۆشرێن.

ئەمە یەكەم جارە ماتۆڕ لەبەردەم دووكانەكاندا دەگیردرێن و كۆدەكرێنەوە و دەستیان بەسەردا دەگیرێت، پێشتر تەنیا لە هەڵمەتەكاندا ماتۆڕیان دەگرت.

ماتۆڕەكان لە جۆری ئێرانی مەكینە بچوكن، لە ناو خەڵكدا پێیان دەوترێت”پێنج ونیو، هیچ مۆڵەت و ناونیشانێكیان نییە.

پێداچوونەوە: کوردستان ئەحمەد