چیرۆکی گۆرانی ئەی پەری هونەرمەند محەمەد جەزا
964+
بەشی کوردی
چی حەسرەتێکی بەسوێیە لەشتێکی بچوکا دڵی ئازیزێکت لێ دەڕەنجێت و ئیدی مردن رێگا نادات هەرگیز ئەو دڵشکانە چاکبکەیتەوە.
کۆتایی ساڵانی حەفتای سەدەی رابردوو، لە هەولێر دوو هاوسەری دڵپڕ خۆشەویست و بەختەوەر هەبوون، وەک دەڵێن رۆحیان لەسەر سەری یەک بوو.. بێ یەکتر هەرگیز هەڵیان نەدەکرد.
تەڵعەت و پەری ناوی ئەو دوو مرۆڤە دڵپڕ خوشەویستەبوون کە دواتر بوون بە سەردێری چیرۆکێکی خەمناک.
تەڵعەت و پەری مامۆستا بوون لە قوتابخانەیەکی سەرەتایی شاری هەولێر، ماڵیان لە یەکێک لە گەڕەکەکانی نزیکی قەڵای هەولێر بوو.
مامۆستا تەڵعەت لەگەڵ پیشەی مامۆستایی مۆسیقاژەنیش بوو.
چیرۆکی ژیانی ئەو دوو هاوسەرە لەو کاتەوە دەستپێدەکات کە رۆژێک بەهۆی دەمەقاڵێیەکەوە پەری لە تەڵعەتی هاوسەری زویر دەبێت و بڕیار دەدات بچێتەوە ماڵی باوکی کە لەسەر قەڵای هەولێر بووە.
کاتەکان تێدەپەڕن و ئێوارەی ئەو رۆژە پەری بڕیار دەدات بگەڕێتەوە ماڵ، لە رێگا نزیک سینەما حەمرا، ئەو کاتە دوکانێکی چاککردنەوەی تانکی گەورەی نەوت هەبووە، وەستایەک خەریکی لەحیمکاریی بووە بۆ تانکیەکی نەوت، لە کاتی گەیشتنی پەری بۆ ئاستی دوکانەکە تانکیەکە دەتەقێتەوە و پەری بەر ئەو کارەساتە دەکەوێت و گیانی لەدەستدا.
ئەو رۆژە بۆ مامۆستا تەڵعەت دوو کارەسات دەبێت، یەکەم لەدەستدانی خۆشەویسترین کەسی و دوەمین کارەساتیش جێهێشتنی پەری بوو بە دڵشکاوی.. مەرگ مەودای نەدا و بەوە رانەگەیشت دڵی ئازیزەکەی چاکبکاتەوە.
دوای ماوەیەک سەربوردەی ئەو دوو هاوسەرە لەلایەن دکتۆر ئەکرەم خامۆش دەکرێتە شیعرێکی خەمناک بەناوی یاد و کۆچ. دواتر لەلایەن مامۆستا تەڵعەت ئاواز بۆ شیعرەکە دادەنرێت و هونەرمەند محەمەد جەزا لەگەڵ تیپی مۆسیقای هەولێر لە بەغدا تۆماری دەکات.