با لێخۆشبوون قەرزی کارەباش بگرێتەوە

964+

پێشەوا محەمەد – سلێمانی

ئەنجومەنی پارێزگای سلێمانی لە رێگەی نووسراوێکەوە داوا لە ئەنجوومەنی وەزیران دەکات، لێخۆشبوونی 15% قەرزی کارەباش بگرێتەوە.

داواکەی ئەنجومەنی پارێزگای سلێمانی دوای ئەوە هات، کە وەزارەتی شارەوانی و گەشتوگوزار بڕیاری لێخۆشبوونی 15%ی قەرزی ئاوی بۆ هاوبەشان لە 10.4.2023 تا 10.5.2023 راگەیاند.

بەڕێوەبەرایەتیی کارەبای سلێمانی 640 هەزار هاوبەشی هەیە و زیاتر لە 500 ملیار دیناریش قەرزیان لای هاوبەشەکانیانە، بە دامودەزگە حکومییەکانیشەوە.

ئەگەر ئەو لێخۆشبوونە بۆ قەرزی کارەباش بێت، هەم هاوڵاتی سوودی لێدەبینێت، هەم حکومەت داهاتی بۆ دەگەڕێتەوە، ئەمە قسەی کاسترۆ مەعروف، ئەندامی ئەنجومەنی پارێزگای سلێمانییە بۆ تۆڕی 964.

وتیشی، “نووسراوەکەمان لە رێگەی سەرۆکی ئەنجومەنەوە ئاراستەی ئەنجومەنی وەزیران دەکرێت بۆ رەزامەندیان لەوبارەیەوە”.