پاسەکەی یانەی نەوتی باکوور نەگەیشتە سلێمانی و وەرگەڕا

964+

کاروان ساڵحی – کەرکوک

بۆ ئەنجامدانی یارییەکەی دۆستانە لەگەڵ یانەی دەربەندیخان، یانەی نەوتی باکوور بەرەو سلێمانی دەکەونەڕێ بەڵام ناگەنەجێ کە پاسەکەیان وەردەگەڕێت. سەرپەرشتیاری یانەکەش دەڵێت: سەرجەم یاریزانەکان سەلامەتن.

پاسی یانەی نەوتی باکور، کاتژمێر 10:30ـی ئەمڕۆ پێنجشەممە 16.3.2023 لە کەرکوکەوە بەرەو سلێمانی کەوتۆتەڕی بە مەبەستی ئەنجامدانی یارییەکی دۆستانە لەگەڵ یانەی وەرزشی دەربەندیخان.

پاسەکە کەرکوک جێدەهێڵیت و دەگاتە ناحیەی بازیان و بەرەو سلێمانی دەڕۆیشتن کەتێک لە یوتێرنێکی لای گۆپاڵە ئۆتۆمبێلێک دەسووڕێتەوە و دێتە بەردەم پاسەکە.

پەیامنێری 964ـی دەڵێت: شوفێری پاسەکە ویستوویەتی خۆی لە ئۆتۆمبێلەکە رزگار بکات بەڵام کاتێک تایەیەکەی دەکەوێتەسەر شۆڵدەر، بەهۆیەوە کۆنتڕۆڵ لەدەستدەدات و دواتریش وەردەگەڕێت.

ئەحمەد حەبیب، سەرپەرشتیاری یانەکە لەڕێگەی تەلەفۆنەوە بە 964ـی وت، سەرجەم یاریزانەکان سەلامەتن و داوامانکردووە پاسێکی دیکە بێت بە شوێن یاریزانەکان بۆ گەڕانەوەمان بۆ کەرکوک، بەهۆی رووداوەکەش یارییە دۆستانەکە هەڵوەشاوەتەوە.

پێداچوونەوە: فەرمان سادق