سەرۆکی نوێی شارەوانی:
رێکارەکانی پێدانی زەوی بە فەرمانبەرانی کەلار خێراتر دەکرێت
964+
میلاد جەلال – کەلار
لە کەلار رێکارەکانی پێدانی زەوی بە فەرمانبەرانی خێراتر دەکرێت و سەرۆکی شارەوانیش دەڵێت، چارەسەری هەموو ئەو گرفتانە دەکەین کە لەبەردەم دابینکردن و دابەشکردنی زەوی دروست بووە.
سامان رەحیم، کە ئەمڕۆ یەکشەممە وەکو سەرۆکی نوێی شارەوانی کەلار دەستبەکاربوو، مژدەی دابەشکردنی زەوی بە فەرمانبەران دا و وتیشی “ھەر لەگەڵ دەستبەکاربونمان بەدواداچونم کردووە بۆ دابەشکردنی زەوی فەرمانبەران لە کەلار، کاری جدی دەکەین بۆ خێراکردنی کارەکانی”.
روپێویکردنی زەوی جوتیاران و قەرەبوکردنەوەیان دابەشکردنی زەوی لەکەلار دواخستووە، کشتوکاڵی گەرمیان پێشتر رایانگەیاند بوو لیژنەکانیان گرفتی کەمی ئۆتۆمبێل و نەبونی بودجەی پێویست ھەیە بۆیە کارەکانی قەرەبوکردنەوەی جوتیاران بەخاوی بەڕێوەدەچێت.
سەرۆکی شارەوانی دەڵێت “لەم ھەفتەیە سەردانی بەڕێوەبەرایەتی گشتی کشتوکاڵی گەرمیان دەکەین، ئەو پێداویستیانەی ھەیانە بۆیان دابین دەکەین لە ئۆتۆمبێل و بودجە بۆ ئەوەی کارەکانیان خێراتر بکەن و بەزوویی زەوی بەسەر فەرمانبەران دابەش بکەین”.
پێداچوونەوە؛ فەرهاد حەسەن
