فەتاحى تێکەوت؛ موشەکی 2 تۆنی تەلئەبیب و بنکەکانی ئەمریکای هەژاند

964+

وریا فەتاح

لە حەوتەمین رۆژی جەنگدا، سوپای پاسدارانی ئێران بە فەرمی دەستپێکردنی قۆناغێکی نوێ و کوشندەی هێرشەکانی راگەیاند، کە تێیدا موشەکی خوڕەمشەهر و نەوەی نوێی موشەکی “فەتاح”ی بەکارهێناوە.

سوپای پاسداران لە راگەیەندراوی ژمارە 22دا ئاماژەی بەوە کردووە، کە ئەم بەیانییە (هەینی) لەژێر ناوی ئۆپەراسیۆنی “بەڵێنی راستەقینەی 4″، هێرشێکی بەرفراوانیان ئەنجامداوە. هێرشەکە وەک وەڵامێک بووە بۆ بۆردومانکردنی قوتابخانەی “میناب” لە ناوخۆی ئێران.

وەک باسکراوە، بۆ یەکەمجار لەم جەنگەدا، ئێران موشەکی “خوڕەمشار 4″ی بەکارهێنا، کە تایبەتمەندییە سەربازییەکانی بریتین لە:

کڵاوەی جەنگی: کێشی کڵاوەکەی 2,000 کیلۆگرام (2 تۆن) تەقەمەنییە.
خێرایی: بە خێرایی 14 ماخ (14 هێندەی خێرایی دەنگ) دەچێتە سەر ئامانجەکەی، کە تێکشکاندنی لەلایەن سیستەمە بەرگرییەکانەوە زۆر ئەستەمە.
بەپێی راگەیەندراوەکە، موشەکەکان چەندین خاڵی ستراتیژییان پێکاوە، لەوانە:

1.  تەلئەبیب: پایتەختی ئیسرائیل و فڕۆکەخانەی نێودەوڵەتی “بێن گۆریۆن”.

2.  حەیفا: ناوەندە سەربازییەکانی ئەو شارە.

3.  بنکەکانی ئەمریکا: سەرجەم بنکە سەربازییەکانی ئەمریکا و ئیسرائیل لە وڵاتانی دەوروبەری کەنداو.

ئیسرائیل چى دەڵێت؟

بەپێى هەواڵى میدیاى فەرمى ئیسرائیل، تیمە پزیشکییەکان ئاشکرایان کردووە کە تا ئەم ساتە هیچ زانیارییەک لەسەر برینداربوون یان گیانلەدەستدان بەهۆی هێرشەکەوە تۆمار نەکراوە.

بەپێی هەڵسەنگاندنە سەربازییەکان، ژمارەیەکی کەم موشەک ئاراستە کراون و هیچ کامێکیان راستەوخۆ بەر ناوچەکانی نیشتەجێبوون نەکەوتوون. تەنیا پاشماوەی موشەکە تێکشکێنراوەکان (پارچە) لە هەندێک ناوچە کەوتوونەتە خوارەوە.

ئاشکراشیان کردووە کە دەنگی تەقینەوەیەکی زۆر لە ئاسمانی تەلئەبیب بیستراوە، کە بەهۆی تێکشکاندنی موشەکەکان بووە لە لایەن سیستەمی بەرگری ئاسمانی ئیسرائیلەوە، یان کەوتنەخوارەوەی موشەکەکان لە ناوچە چۆڵ و کراوەکاندا.