وەک پشتیوانییەک بۆ کوردانی رۆژئاوا
خاوەنکارێکی سلێمانی چاڵێنجی هەڵکردنی ئاڵای کوردستان دەکات
964+
دیلان محەمەدجەزا – سلێمانی
خاوەنی کافێیەک لە سلێمانی بە کارێکی جیاواز دەیەوێت هەڵوێستێکی نیشتمانی وەربگرێت و چاڵێنجی کافێ و شوێنە گەشتیارییەکانی سلێمانی دەکات ئاڵای کوردستان هەڵبکەن و بەم هەڵوێستەش پشتگیری خۆیان بۆ رۆژئاوا و بەرخۆدانەکەیان رابگەیەنن.
سەهەند سەلام خاوەنی کافێکەیە، قسەی بۆ 964 کرد و وتی، “کاتێک سەردانی وڵاتانی دەرەوە دەکەین دەبینین هەمووان لە شوێنە گشتییەکان ئاڵای وڵاتەکانیان هەڵداوە، ئێمەش ئەم باردودۆخەی رۆژئاوامان بەهەل زانی بۆ ئەوەی پشتیوانی خۆمان بۆ کوردانی رۆژئاوا رابگەیەنین و ئەگەر نەتوانین شەڕیش بکەین ئاڵاکەمان پیشانی ئەو گەشتیارانە بدەین کە روو لە وڵاتەکەمان دەکەن و بڵێین ئێرە کوردستانە و دەمانەوێت لەم رێگەیەوە زیاتر دۆزی کورد بناسێنین”.
وتیشی، ئەو کەسانەی چاڵێنجم کردوون بەدەم داواکارییەکەوە هاتوون و دەمانەوێت ئاڵای کوردستان لە هەموو کوچە و کوڵانێکی شار هەبێت و تەنیا بۆ ئێستاش نا، بەڵکو بۆ هەمیشەیی بمێنێتەوە.
پێداچوونەوە: ژێوار خدر
