سەیڤ كۆبانێ، سەیڤ رۆژئاوا

964+

ئەحمەد شەمزین

ئەمشەو، كە بەرەبەیانی سێشەممە 20.1.2026ـە، لە هەولێر ژمارەیەكی زۆری هاوڵاتیانی كوردستان و بە تایبەتی كوردانی رۆژئاوا، كە لە هەولێر نیشتەجێن، چوونە بەردەم كونسڵخانەی ئەمریكا و داوا دەكەن رۆژئاوای كوردستان بپارێزرێت.

هاوڵاتیان بە پیر و گەنج و ژن و منداڵەوە چوونەتە بەردەم كونسڵخانە نوێیەكەی ئەمریكا لەسەر رێگەی هەولێر پیرمام و داوای وەڵامی ئەمریكییەكان دەكەن.

هاوڵاتییەكی كورد بە 964ی وت، دژی هێرشی گرووپە چەكدارەكانی سەر بە حكومەتەكەی ئەلشەرع هاتووینەتە سەر شەقام، كە دەستیان بە هێرش و پەلاماردانی خەڵكی رۆژئاوای كوردستان كردووە.

هاوڵاتییەكی دیكەش دەڵێت، ئەمشەو تا بەیانی لێرە دەبین و ناچینەوە، داوا دەكەین بە هەموو شێوەیەك پاڵپشتیی كوردانی رۆژئاوا بكرێ دژی هێرشی گرووپەكان، كە وەكو داعشن.

پێداچوونەوە: ئەرسەلان عەبدوڵا