"هەوڵەکان بۆ دەستگیرکردنی تۆمەتباران بەردەوامە"
بە دلیڤەری نارنجۆکێک و چوار فیشەک بۆ هاوڵاتییەک نێردرا
964+
کاروان ساڵحی – کەرکوک
بە دلیڤەری نارنجۆکێک و چوار فیشەک وەک هەڕەشەکردن بۆ هاوڵاتییەکی دانیشتووی کەرکوک نێردرا، بەڵام پیلانەکە سەرکەوتوو نەبوو و پوچەڵکرایەوە.
سەرچاوەیەک لە بنکەی پۆلیسی ئازادی کەرکوک بە 964ـی وت، “درنگانێکی شەوی رابردوو ماتۆرێک بە دلیڤەری کارتۆنێکی بچووکی بردووە بۆ ماڵێکی پڕۆژەی نیشتەجێبوونی کەرکوک سیتی، کارتۆنەکە نارنجۆکێک و چوار فیشەکی تێدابووە، خاوەن ماڵەکە زوو پێیزانیوە و هێزەکانی پۆلیسی لەو بابەتە ئاگادار کردووەتەوە”.
هەرزوو هێزە ئەمنییەکان چوونەتە شوێنەکە و نارنجۆکەکەیان پوچەڵکردووەتەوە و فیشەکەکانیشیان لەگەڵ خۆیان بردووە.
ئاماژەی بەوەشکرد، ئەو هاوڵاتییەی کەرکوک پێشتر کەفیلی برادەرێکی کردووە، دواتر کێشە کەوتووەتە نێوانیان و هاوڕێکەی هەڵاتووە بۆ بەریتانیا، کێشەکەیان بەردەوام بووە، تا ئەوەی کە کەسێکی راسپاردووە و بەوە شێوەیە و وەک هەڕەشە ئەو نارنجۆک و فیشەکانی بۆ ناردووە.
سەرچاوەکە وتیشی، هێشتا ئەو کەسەی ئیشی دلیڤەرییەکی کردووە، دەستگیر نەکراوە، لێکۆڵینەوە و بەدواداچوون لەڕێی کامێراکانی چاودێرییەوە دەستیپێکردووە و دەیانەوێ بەو شێوەیە، هەموو ئەو کەسانە دەستگیر بکەن کە دەستیان هەبووە لەو کارەدا.
پێداچوونەوە؛ شۆڕش قادری
شۆفێرێکی دیلیڤەری گیانی لەدەست دا
