60 ملیۆن دینار و 10 هەزار لیتر نەوت کۆکراوەتەوە
20 بارهەڵگر لە خورماتووەوە هاوکاری دەگەیننە چەمچەماڵ
964+
سیروان خورشید – خورماتوو
کۆکردنەوەی هاوکارییەکان لە ناوچە جیاجیاکانی کوردستان بۆ زیانلێکەوتووانی لافاوەکەی چەمچەماڵ بەردەوامە و ئەمڕۆ 20 بارهەڵگر لە خورماتووەوە دەگەنە چەمچەماڵ.
چەند رۆژێکە هاوشێوەی شار و شارۆچکەکانی دیکەی کوردستان لە خورماتووش هەڵمەتی کۆکردنەوەی هاوکاری بۆ خەڵکی لێقەومای چەمچەماڵ و ناحیەی شۆڕش راگەیەنراوە، هاوکارییەکان کۆکراونەتەوە و ئەمڕۆ لە رێگەی 20 بارهەڵگرەوە دەگوازرێنەوە بۆ قەزای چەمچەماڵ و بەسەر زیانلێکەوتووانی لافاوەکە دابەش دەکرێن.
جگە لەو کەلوپەلانە، نزیکەی 60 ملیۆن دینار و زیاتر لە 10 هەزار لیتر نەوتیش بۆ هاوکاری خەڵکی چەمچەماڵ لە دووزخورماتوو کۆکراوەتەوە.
هەفتەی رابردوو بەهۆی بارانبارینی بەخوڕ لافاو لە چەمچەماڵ و چەند شوێنێکی دیکەی کوردستان دروستبوو و بەهۆیەوە پێنج کەس گیانیان لەدەستدا و بە سەدان خانووش زیانیان بەرکەوت.
پێداچوونەوە؛ شۆڕش قادری
لە عەربەتیش کەمپینێک بۆ کۆکردنەوەی هاوکاری بۆ چەمچەماڵ رێکخرا
