دەمیرتاش نیگەرانە و دیداری لەگەڵ سیاسی و پارێزەران راگرت

964+

ئەحمەد مستەفا

ئەوەی زۆرترین ئازارم دەدات، ئەوەیە کە بیروڕاکانم، تەنانەت لێرەش نەموتوون، دەستکارى دەکرێن دواتر بۆ رای گشتیی دەرەوە دەگوازرێنەوە، من لێرە بە شەرەفەوە چوومەتە ژوورەوە، و بە هەمان شێوەش یان بە سەری بەرزەوە دێمە دەرەوە یان تا دوا رۆژی ژیانم لێرە دەمێنمەوە، بەدیلی دیکەم نییە.

ئەمە پەیامێکی نووسراوە لە زیندانەوە، بەدەستوخەتی سەڵاحەدین دەمیرتاش هاوسەرۆکی پێشووی “هەدەپە” ئەو پارتەی بەهۆی قەدەغەکردنی هەڵوەشێندرایەوە، پەیامەکە بە خەتێکی شین و لە پێگەی فەرمی دەمیرتاش پارێزەرەکانی لە تۆڕی ئێکس بڵاویان کردووەتەوە.

وا دەردەکەوێ قسەکانی دەرەوەی زیندان یان نەگواستنەوەی پەیامەکان وەکخۆی دەمیرتاشی نیگەران کردووە و دەڵێت، مانەوە لە زیندان بە ناحەق بۆ ماوەی نۆ ساڵ، تەنیا یەک شێوازی قورسی هەیە، تەنانەت کەسایەتییەکانیش بۆیان نییە لە بری من قسە بکەن، لە کاتێکدا کە پێویست بووبێت، خۆم بیروڕاکانم لەگەڵ رای گشتی دەگوازمەوە.

ئەم پەیامەی دەمیرتاش دوای لێدوانەکانی بولەنت ئارنچ، سەرۆکی پێشووتری پەرلەمانی تورکیا دێت، کە دوای دیداری لەگەڵ دەمیرتاش بڵاویکردەوە، ئارنچ وتبووی دەمیرتاش داوای بینینی ئەردۆغان دەکات.

سەڵاحەدین دەمیرتاش لە رۆژی 4ـی تشرینی دووەمی 2016ــەوە لە گرتووخانەی ئەدیرنە بەندکراوە، هەر لە دەستنووسەکەدا سەڵاحەدین دەمیرتاش رایگەیاندووە، لەمەودوا جگە لە هاوڕێکانی خۆی، دیدار لەگەڵ هیچ سیاسەتوان و پارێزەرێک ناکات.

دەقی نامەکەی دەمیرتاش بەمشێوەیەیە:

سڵاو،

مانەوە لە زیندان بە ناحەق بۆ ماوەی ٩ ساڵ، تەنها یەک شێوازی قورسایی هەیە. بەڵام بوون بە بەشێک لە خەباتی ئازادی، دیموکراسی و ئاشتیی گەل، هێزی بەرگەگرتن و ئیرادەیەکی پۆڵایینی بۆ سەرکەوتن بەسەر هەموو سەختییەکاندا دەبەخشێت.

ئەوەی زۆرترین ئازارم دەدات، ئەوەیە کە بیروڕاکانم، کە تەنانەت لێرەش نەموتوون، دەستکارى دەکرێن و بۆ ڕای گشتیی دەرەوە دەگوازرێنەوە. من نیازی ئەو کەسانە ناپرسم کە ئەم کارە دەکەن، بەڵام پێویستە هەموو کەسێک ئەمە بزانێت: من لێرە بە شەرەفەوە و بە سەری بەرزەوە چوومەتە ژوورەوە، و بە هەمان شێوەش یان بە سەری بەرزەوە دێمە دەرەوە یان تا دوا ڕۆژی ژیانم لێرە دەمێنمەوە. بەدیلی دیکەم نییە.

تەنانەت کەسایەتییەکانیش بۆیان نییە لە بری من قسە بکەن. لە کاتێکدا کە پێویست بووبێت، خۆم بیروڕاکانم لەگەڵ ڕای گشتی دەگوازمەوە. من لێرەوە لێدوانێک بڵاو دەکەمەوە کە ڕاست و دروستە، چونکە لێدان لە من بە قسەی نادروست دەستم پێ ناکات. بەداخەوە بە چەواشەکاری، دروستکردن و شێواندن و بەم شێوازە ڕووبەڕووی ئەو بیروڕایانە دەبمەوە کە بۆ من داڕێژراون. بەداخەوە، ئەمە لە ماوەی ئەم ساڵانەدا لە زیندان کراوە و هەوڵدان بۆ ڕاستکردنەوەی هەڵەکانیش بووەتە ئازارێکی جیاواز.

بەم تێگەیشتنە ناچارکراوە، دەمەوێت بۆ هاوڕێ سیاسییەکانم و پارێزەرەکانم ڕوون بکەمەوە کە لەمەودوا بەم شێوەیە دەجمێن. چونکە هیچ ڕێگایەکی دیکە نەماوە بۆ ڕێگریکردن لەم چەواشەکاری و خراپ بەکارهێنانانە.

لە ناخی دڵەوە سڵاو لە هەمووتان، بە خۆشەویستییەوە…

دەقی پەیامە دەستنووسەکەی دەمیرتاش