نیسابی كۆبوونەوەی پەرلەمانی عێراق تەواو نەكرا و دواخرا

964+

ئەرسەلان عەبدوڵا

پەرلەمانی عێراق دانیشتنی ئەنجام نەدا و بەهۆی تەواونەبوونی نیسابی یاسایییەوە كۆبوونەوەی دواخست، هاوكات كارنامەی دانیشتنی سێشەممە و چوارشەممەی بڵاوكردەوە.

ئەنجومەنی نوێنەرانی عێراق “پەرلەمان” ئەمڕۆ دووشەممە 15.9.2025 لە راگەیاندراوێكدا ئاشكرای كرد، بەهۆی تەواونەبوونی نیسابی یاسایی و ئامادەنەبوونی ژمارەی پێویستی پەرلەمانتاران، كۆبوونەوەكەی بۆ سبەی دواخست.

هاوكات پەرلەمانی عێراق كارنامەی دانیشتنی سبەی و دووسبەی بڵاوكردەوە، كە چەندین بڕگە و یاسای گرنگ لەخۆدەگرێت، لەوانە هەمواری یاسای قەرەبووكردنەوەی ئەو كەسانەی بەهۆی كردەوەكانی رژێمی بەعس زەرەرمەندبوون یان بەشێكی جەستەیان لەدەستداوە، دەنگدان بۆ یاسای تەندروستی دەروونی و یاسای وزە نوێبووەكان، هەمواری یەكەمی یاسای بەرگری شارستانی، هەروەها هەمواری یەكەمی یاسای یەكێتییە وەرزشییەكان و چەندین بڕگە و یاسای دیكە.