بەرگى کتێبى فایلى قەندیل
تێکەڵەیەک لە واقیع و کۆمیدیا
هەرێم کەریم نووسیویەتى؛ رۆمانی “فایلی قەندیل” بە ئینگلیزی بڵاو دەبێتەوە
964+
وریا فەتاح
رۆمانی “فایلی قەندیل” کتێبێکی نوێی د. هەرێم کەریمە و بە زمانی ئینگلیزی لە بەریتانیا بڵاوکراوەتەوە، ناوەڕۆکەکەى چیرۆکێکی سەرنجڕاکێشی کوردییە کە رەهەندێکی جیهانی هەیە.
لە بەشێکى رۆمانەکە، چیرۆکى رۆژنامەوانێک دەگێڕێتەوە کە هێرشێکی فڕۆکەی بێفڕۆکەوان رزگاری دەبێت و بەشێک لە یادگەی (میمۆری) لەدەست دەدات.
رۆمانەکە لە 300 لاپەڕە پێکدێت، بە وتەى هەرێم کەریم کە نوسەرەکەیەتى و بۆ 964 قسەى کردووە، هەوڵیداوە لەڕێگەی ئەم ڕۆمانەوە چیرۆکی ڕووبەڕووبونەوەی دەسەڵات بگێڕێتەوە لەلایەن گروپێکی یاخییەوە، بەبەکارهێنانی تەکنەلۆجیای نوێ.
هەرێم کەریم کە پسپۆڕیی دیموکراسی ئەلیکترۆنییە، پێشتر بە زمانی ئینگلیزی کتێبێکی دیکەی بە ناونیشانی “سایبەردیموکراسی؛ گۆڕینی سیاسەت” لە دەزگای پاڵگرەیف مەکمیلەنی جیهانی بڵاو کردووەتەوە، لەبەر ئەوە رۆڵی تەکنەلۆجیای نوێ لە شەڕی هەواڵگرى و دەسەڵاتدا لە رۆمانەکەیدا کردووە بە بنەما.
دکتۆر موحسین ئەدیب، بەڕێوەبەرى گشتیى رۆشنیرى و هونەرى سلێمانى لەبارەى رۆمانەکەوە نووسیویەتى،” رۆمانەکە، بە شێوەیەکی ژیرانە و تەنزئامێز و بەزمانێکی پاراو، لەدووتوێی حەفتا چاپتەردا باس لە دیوە شاراوەکەی پڕۆسەی سیاسی لەباشوری کوردستان دەکات، بەریەککەوتنی دەزگا هەواڵگرییە ناوخۆیی و جیهانییەکان، رۆڵی ئەرێنی و نەرێنی دادگاکانی هەیگ و جنێڤ و نەتەوەیەکگرتووەکان و ئاشکراکردنی گەندەڵی و یارییە شاراوەکانی دەسەڵات، وات لێدەکات پێبکەنیت، بیربکەیتەوە و پرسیارت لەلا دروستبێت”.
وەک باسى دەکات، لە لاپەڕەی یەکەمەوە خوێنەر پەلکێشی ناو جیهانێک دەکات، کە تێیدا سیاسەتی کوردی، ئۆپەراسیۆنە هەواڵگرییەکانی وڵاتانی ناوچەکە و جەنگی فڕۆکەی بێفڕۆکەوان و داینامیکی هێزە کوردییەکان دەخرێنەڕوو.
“لەم رۆمانەدا، زاگرۆس، ئەو رۆژنامەوانەی لە هێرشێکی فڕۆکەی بێفڕۆکەوان رزگاری دەبێت و بەشێک لە یادگەی (میمۆری) لەدەست دەدات، لێزانانە بەریەککەوتنی واقیعە ناوخۆییەکان و هێزە جیهانییەکان پێکەوە تەقەڵدور دەکات”، موحسین ئەدیب وا دەڵێت.
دەشڵێت: رۆمانێکە پڕ لە سەلیقە و هونەری گێڕانەوە بە تەکنیکێکی تەواو جیاواز، تێکەڵەیەک لە واقیع و کۆمیدیا، رستەی پوخت و پڕ مانا، رۆمانێک کە دوای خوێندنەوەی، چیرۆک و رووداوەکان لەخەیاڵماندا دەمێنێتەوە.
ئێستا رۆمانەکە لە زۆربەی وڵاتانی جیهان بەردەستە بە بەرگی رەق و بەرگی نەرم و دیجیتاڵ و بەدەنگیش.
