چیدیكە “عمولە” لە جوتیارانی پێنجوێن وەرناگیرێت

+964

کامیار کەمال- پێنجوێن

بەپێی بڕیاری قایمقامیەتی قەزای پێنجوێن چیدیکە عمولە لە جوتیاران یاخود فرۆشیاران وەرناگیرێت.

هێمن ئیبراهیم قایمقامی پێنجوێن بە 964ی راگەیاند، پێشتر لیژنەی ئابووری قایمقامیەتی راسپاردووە بۆ لێکۆڵینەوە و بەدواداچوون لەسەر قسەی جوتیاران، کە باسیان لە وەرگرتنی عمولە دەکرد لە کاتی فرۆشتنی بەرهەمەکانیان.

وتیشی، دوای بەدواداچون بڕیاردراوە چیدیکە عمولە لە جوتیاران و فرۆشیاران وەرنەگیرێت و بەرامبەر فرۆشتنی بەرهەمەکانیان، تەنیا پارەی حەماڵانە وەردەگیرێت بۆ ئەوکەسانەی کە باری جوتیارەکە دادەگرن.

هێمن ئیبراهیم باسی لەوەش کرد، بڕیارەکە دوای بەدواداچوونی لیژنەی ئابووری هاتووە، لەسەر داواکاری جوتیارانی قەزاکە.

هاوکات بەختیار قادر سەرۆکی ئەنجومەنی جوتیارانی پێنجوێن بە 964ی راگەیاند، لە رۆژی 3.7.2017ەوە وەزارەتی کشتوکاڵ بڕیاری دەرکردووە، کە نابێت عمولە لە فرۆشیار و جوتیار وەربگیرێت، بەڵام ئەو بڕیارە تەنیا لە پێنجوێندا جێبەجێ نەکراوە، تا ئەمڕۆ بە بڕیاری قایمقام خرایە بواری جێبەجێکردنەوە.

وتیشی، بەپێی یاسا دەبێت سەرجەم بەشەکانی عەلوەی پێنجوێن پابەندن بە بڕیارەکەوە و جێبەجێ بکرێت و دەستخۆشیان هەیە بۆ قایمقامیەت و دادگای پێنجوێن.

پێداچوونەوە: ئەرسەلان عەبدوڵا