زێی گه‌وره‌ گیانی گه‌نجێكی دیكه‌ی برد

+964
ده‌شتی عارف – هه‌ولێر

ئه‌مڕۆ هه‌ینی، 5.9.2025، گه‌نجێكی دانیشتووی قه‌زای خه‌بات، به‌ مه‌به‌ستی خۆ فێنككردنه‌وه‌ چووه‌ته‌ نێو ئاوی زێی گه‌وره‌ لە سنووری قەزای خەبات و خنكاوه‌، ته‌رمه‌كه‌شی ره‌وانه‌ی پزیشكی دادی هه‌ولێر كراوه‌.

موقه‌ده‌م ئاراس گه‌ردی، به‌ڕێوه‌به‌ری به‌رگریی شارستانیی خه‌بات، به‌964ـی وت، “كاتژمێر پێنجی ئێواره‌ی ئەمڕۆ هەینی 9.5.2025 له‌ رووداوێكی كه‌وتنه‌ ناو ئاو ئاگادار كراینه‌وه‌ و ده‌ستبه‌جێ تیمه‌كانمان گه‌یشتنه‌ شوێنی رووداوه‌كه‌ و كاتژمێر پێنج و 50 خوله‌ك ته‌رمه‌كه‌مان دۆزییه‌وه‌ و دوای ده‌رهێنانی ره‌وانه‌ی پزیشكی دادی هه‌ولێرمان كرد”.

له‌ باره‌ی ناسنامه‌ی گه‌نجه‌كه‌، موقه‌ده‌م ئاراس وتی، “گه‌نجه‌كه‌ ناوی شه‌مسه‌دین ئیبراهیمه‌ و ته‌مه‌نی 29 ساڵ بوو، هه‌ر له‌ قه‌زای خه‌باتیش ده‌ژیا و سه‌ڵت بوو”.

به‌پێی ئاماره‌كانی به‌رگریی شارستانیی خه‌بات، ته‌نیا له‌م ساڵدا له‌ زێی گه‌وره‌ 13 هاوڵاتی خنكاون و چوار كه‌سیش له‌ خنكان رزگاركراون.

پێداچوونەوە: ئەرسەلان عەبدوڵا

كچێكی گەنج لە زێی گەورە خنكا