پیشەوەرێکی بەئەزموونی شاری کەرکوک
“لە یادی مەولوددا بازاڕی دەف گەرمە”
+964
کاروان ساڵحی – کەرکوک
لەگەڵ یادی مەولود، بازاڕی دەف و تەپڵ لە کوردستان و عێراق گەرمە، سەید عەبدولڕەحمان عەبدوڵا، پیشەوەرێکی بەئەزموونی شاری کەرکوکە کە نزیکەی 35 ساڵە لەم بوارەدا کار دەکات و دەڵێت ئەمساڵ خواستی زیاتر لەسەر بەرهەمەکان هەیە.
سەید عەبدولڕەحمان بە 964ـی وت، “ساڵانە لە کاتی مەولود خواست لەسەر دەف زۆرە، بەڵام ئەمساڵ خواستەکە زیاتر بووە، بەتایبەتی دەفی پاکستانی و عێراقی زۆر داوا دەکرێن و داواکارییەکانیش تەنیا بۆ ناو کەرکووک نییە، بەڵکو شارەکانی وەک هەولێر، بەغدا، سلێمانی، فەلوجە و دیالەش لەخۆ دەگرێت.
وەک خۆی دەڵێت، تەنیا بۆ یادی مەولودی ئەمساڵ زیاتر لە سەد دەفی دروستکردووە.
“جگە لە دەف، خواست لەسەر تەپڵیش هەیە کە بە تایبەتی بۆ مەولودی و زیکرکردن بەکار دەهێنرێت و لە پێستی وشتر دروست دەکرێت. نرخەکان بۆ هەردووکیان، واتە دەف و تەپڵ، بە یەک شێوەیە و 25 هەزار دینارە”. سەید وای وت.
دەشڵێت، خاتری کڕیارەکانم دەگرم و هەرکەسێکیش دەفم لێ بکڕێت بۆ ماوەی یەک مانگ کاتی دەدەمێ، گەر بەدڵی نەبوو دەتوانێت بیگەڕێنێتەوە بۆم.” ئەمەش نیشانەی متمانە و باوەڕبوونیەتی بە کوالیتی بەرهەمەکانی.
کارگەی بچووکی سەید عەبدولڕەحمان لە کەرکووک، نموونەیەکە لە پیشەیەکی دەستی کە نەک تەنیا کلتوور و نەریتی ناوچەکە دەپارێزێت، بەڵکو لەگەڵ داواکارییەکانی بازاڕیشدا گەشە دەکات.
پێداچوونەوە: ژێوار خدر
