کەبابخانەی مەدحەت لە هەولێری پایتەخت بە تامی سلێمانی

964+

دەشتی عارف ـ هەولێر

کەبابخانەی مەدحەت یەکێکە لە کەبابخانە کۆن و بەناوبانگەکانی سلێمانی، ئێستاش دوو لقی لە شاری هەولێر کردووەتەوە و کەبابە بەتامەکەی سلێمانیان هێناوەتە پایتەخت.

ئومێد هیوا کەبابچی، سەرپەرشتیاری کەبابخانەکە بە 964ـی وت، “بەپێویستمان زانی لەهەولێریش کەبابەکەمان هەبێت و خۆشەویستیمان بۆ هەولێر وایکرد بێینە ئێرە و بە هەمان تام و بۆن و شێواز، کەباب پێشکەشی خەڵکی هەولێر و میوانان بکەین”.

“ئێستا خەڵکێکی زۆر سەردانمان دەکەن و کاتێک تامی کەبابەکەمان دەکەن بەدڵیانە، خەڵک هەبووە لە فڕؤکەخانەی هەولێر دابەزیوە پێش ئەوەی بچێتەوە سلێمانی، هاتووەتە ئێرە، نانی خواردووە و ئینجا چووەتەوە سلێمانی”، وەستا ئومێد وای وت.

ئاماژەی بەوەشکردم هەر شیشێک کەبابیان 150 بۆ 160 گرام گۆشتی پێوەیە و هەر وەک سلێمانی و هەموو لقەکانیان بە پێنج هەزار دینار دەیفرۆشن.

کەبابخانەی مەدحەت لە ساڵی 1936 لە شاری سلێمانی کراوەتەوە و ئێستاش لە سلێمانی خاوەنی دوو لقن،  لە هەولێریش دوو لقیان کردووتەوە و باوک و کوڕ بەیەکەوە کەبابخانەکە بەڕێوەدەبەن.

پێداچوونەوە؛ شۆڕش قادری

ژینگەی هەولێر بۆ کەبابخانە و ماسیفرۆشەکان: بەبێ دووکەڵکردن ئیشى خۆتان بکەن

سەموون و کەباب و هەرچیت حەز لێیە بە بەلاش بیبە